បើយោងតាមបណ្ដាញសារព័ត៌មានអាល្លឺម៉ង់ បានឲ្យដឹងថា អាវុធជាច្រើនដែលប្រទេសអាល្លឺម៉ង់បានផ្ដល់ឲ្យអ៊ុយក្រែន ដើម្បីយកទៅប្រើប្រាស់ ក្នុងជម្លោះជាមួយរុស្ស៊ី មានបញ្ហាបច្ចេកទេស។

គួរបញ្ជាក់ថា ក្នុងពេលដែលវិបត្តិនៅតែបន្តមាន អាល្លឺម៉ង់បានក្លាយជាអ្នកគាំទ្រយោធាធំទី២ សម្រាប់អ៊ុយក្រែន។ តែថ្មីៗនេះ ប្រព័ន្ធផ្សព្វផ្សាយអាល្លឺម៉ង់ជាច្រើន បានទទួលបានឯកសារសម្ងាត់មួយពីក្រសួងការពារជាតិសហព័ន្ធរបស់អាល្លឺម៉ង់ ដែលបង្ហាញថា សព្វាវុធជាច្រើនដែលផ្តល់ដោយអាល្លឺម៉ង់ដល់អ៊ុយក្រែន មានកំហុសឆ្គងផ្នែកបច្ចេកទេស ដោយសារប្រព័ន្ធអាល្លឺម៉ង់ភាគច្រើន គឺសមស្របសម្រាប់តែផ្នែកប្រយុទ្ធប៉ុណ្ណោះ។

មតិពីកងកម្លាំងអ៊ុយក្រែន បង្ហាញថា បញ្ហាចម្បងជាមួយអាវុធអាល្លឺម៉ង់ គឺការចំណាយខ្ពស់លើគ្រាប់រំសេវ ប្រព័ន្ធប្រើប្រាស់ងាយខូច និងការថែទាំស្មុគស្មាញ។

ជាឧទាហរណ៍ កាំភ្លើងធំបាញ់ស្វ័យប្រវត្តិ PzH-2000 ងាយនឹងដំណើរការខុសបច្ចេកទេស ដែលធ្វើឲ្យប៉ះពាល់យ៉ាងខ្លាំងដល់ប្រសិទ្ធភាពប្រយុទ្ធរបស់វា។ លើសពីនេះ រថក្រោះ Leopard អាចខ្វះការការពារគ្រប់គ្រាន់ ឬមានការលំបាកក្នុងការជួសជុល ដោយសាររចនាសម្ព័ន្ធស្មុគស្មាញរបស់វា។

ឯកសារនេះបានកត់ត្រាការកត់សម្គាល់ពីមន្រ្តីអាល្លឺម៉ង់ឈរជើង នៅអ៊ុយក្រែន ដែលបាននិយាយថា អត្រានៃការប្រើប្រាស់អាវុធរបស់អាល្លឺម៉ង់ មានកម្រិតទាបណាស់ ព្រោះពួកគេត្រូវជួសជុលនៅក្នុងរោងចក្រ ហើយរោងចក្រទាំងនេះភាគច្រើន មានទីតាំងនៅភាគខាងលិចអ៊ុយក្រែនដែលនៅឆ្ងាយពីសមរភូមិជួរមុខ៕