អ្នកស្រុកបានអំពាវនាវឲ្យមានជំនួយជាបន្ទាន់ ដើម្បីពន្លត់អណ្ដាតភ្លើងដែលបានឆាបឆេះផ្ទៃដីរាប់រយហិកតា នៅក្នុងរដ្ឋ Oaxaca ភាគខាងត្បូងប្រទេសម៉ិកស៊ិក កាលពីថ្ងៃសៅរ៍ (ទី១២ មេសា)។

បើយោងតាមសេចក្តីរាយការណ៍ពីប្រព័ន្ធផ្សព្វផ្សាយរបស់ម៉ិកស៊ិក បានឲ្យដឹងថា សហគមន៍នានា បានប្រកាសអាសន្ន ចាប់តាំងពីថ្ងៃសុក្រ (ទី១១ ខែមេសា) បន្ទាប់ពីអគ្គិភ័យ បានចាប់ផ្ដើមមាននៅតំបន់ទីក្រុង Santo Domingo Tomaltepec រដ្ឋ Oaxaca ហើយខ្យល់បក់ខ្លាំង បានរុញឲ្យអណ្តាតភ្លើងរាលដាល់ចូលទៅតំបន់ជិតខាង។

បើយោងតាមរដ្ឋាភិបាលប្រចាំរដ្ឋ បានឲ្យដឹងថា អាជ្ញាធរដែលបានបញ្ជូនកងពន្លត់អគ្គិភ័យ និងអ្នកស្ម័គ្រចិត្តមូលដ្ឋានប្រមាណ ៨០នាក់ បានចូលរួមកិច្ចប្រឹងប្រែង ដើម្បីពន្លត់អណ្តាតភ្លើងដែលបានឆេះបំផ្លាញផ្ទៃដីអស់ប្រមាណជា ៥០០ហិកតា។

ប្រព័ន្ធផ្សព្វផ្សាយ នៅរដ្ឋ Oaxacan បានរាយការណ៍ថា នៅថ្ងៃសៅរ៍នោះ អ្នកស្រុកបាននាំគ្នាបិទផ្លូវមួយខ្សែ ដើម្បីទាមទារឲ្យមានជំនួយបន្ទាន់ជួយពន្លត់ចំហេះនេះ ដូចជាបញ្ជូនឧទ្ធម្ភាគចក្រ និងធុងទឹកបន្ថែមទៀត។ ទីភ្នាក់ងារការពារជនស៊ីវិលរបស់រដ្ឋ បានឲ្យដឹងថា អ្នកស្រុក នៅតំបន់ Santa Catarina ត្រូវបានជម្លៀសចេញដោយសារមានតែផ្សែងហុយដ៏ក្រាស់ឃ្មឹកពីអគ្គិភ័យនេះ។

យោងតាមសេចក្តីថ្លែងការណ៍របស់រដ្ឋបាលរដ្ឋ Oaxacan បានឲ្យដឹងកាលពីថ្ងៃសៅរ៍ថា អគ្គិភ័យបានគំរាមកំហែងដល់សហគមន៍ចំនួន ៤ គឺ Santo Domingo Tomaltepec, Santa Catarina de Siena, San Francisco Lachigoló និង Santiago Ixtaltepec ហើយឥឡូវនេះ បើតាមសេចក្ដីរាយការណ៍ គ្រប់គ្រងបាន ៧៥ភាគរយហើយ៕