ក្រុមមន្ត្រីនិយាយថា មេដឹកនាំអឺរ៉ុបមួយចំនួនបានបង្ហោះនៅលើបណ្តាញផ្សព្វផ្សាយសង្គម ក្នុងសាមគ្គីភាពជាមួយអ៊ុយក្រែន បន្ទាប់ពីមីស៊ីលបាលីស្ទីករបស់រុស្ស៊ីចំនួនពីរគ្រាប់បានវាយប្រហារចំកណ្តាលទីក្រុង Sumy ភាគខាងជើងប្រទេសអ៊ុយក្រែន ដែលបានសម្លាប់មនុស្ស៣៤ នាក់ និងរបួស១១៧នាក់ ។

ប្រធានគណៈកម្មការអឺរ៉ុប លោកស្រី Ursula Von der Leyen បានហៅការវាយប្រហារនេះថា «ព្រៃផ្សៃបំផុត» ខណៈមេដឹកនាំផ្សេងៗទៀត ដូចជាប្រធានាធិបតីបារាំង លោក Emmanuel Macron និងអធិការបតីអាល្លឺម៉ង់ លោក Olaf Scholz បានសម្តែងនូវសាមគ្គីភាពសម្រាប់ជនរងគ្រោះ និងក្រុមគ្រួសាររបស់ពួកគេ។

រុស្ស៊ី បានបដិសេធចំពោះការវាយប្រហារដាក់គោលដៅលើជនស៊ីវិល ប៉ុន្តែមនុស្សរាប់ពាន់នាក់ត្រូវបានសម្លាប់ និងរងរបួសនៅក្នុងការឈ្លានពានរបស់ខ្លួនលើអ៊ុយក្រែន។ ការវាយប្រហារនេះបានកើតឡើងបន្ទាប់ពីការវាយប្រហារដោយមីស៊ីលនៅក្នុងទីក្រុង Kryvyi Rih ភាគកណ្តាលប្រទេសអ៊ុយក្រែន ជាស្រុកកំណើតរបស់ លោក Zelenskiy និងឆ្ងាយពីសមរភូមិមុខនៃសង្រ្គាម កាលពីដើមខែនេះ ដែលបានសម្លាប់មនុស្ស២០នាក់ រួមទាំងកុមារ៩នាក់។

អភិបាលក្រុងស្តីទី ក្រុង Sumy លោក Artem Kobzar បានប្រកាសកាន់ទុក្ខរយៈពេលបីថ្ងៃសម្រាប់ជនរងគ្រោះដែលចាប់ផ្តើមពីថ្ងៃចន្ទ ទី១៤ ខែមេសានេះ។

ជាមួយគ្នានេះ រដ្ឋមន្ត្រីការបរទេសអាមេរិក លោក Marco Rubio នៅក្នុងសេចក្តីថ្លែងការណ៍មួយ បានសម្តែងការរំលែកទុក្ខចំពោះជនរងគ្រោះ និងបាននិយាយថា ការវាយប្រហារនេះគឺជា «ការរំលឹកសោកនាដកម្មមួយពីមូលហេតុដែលប្រធានាធិបតី លោក Trump និងរដ្ឋបាលរបស់លោក កំពុងប្រឹងប្រែងយ៉ាងខ្លាំងក្នុងការព្យាយាមបញ្ចប់សង្រ្គាមនេះ។