សារព័ត៌មានរដ្ឋរបស់អ៊ីស្រាអែល Kan TV News បានរាយការណ៍កាលពីថ្ងៃអាទិត្យថា អតីតមន្ត្រីជាង ២៥០នាក់នៃទីភ្នាក់ងារចារកម្ម Mossad របស់អ៊ីស្រាអែល បានចុះហត្ថលេខាលើលិខិតមួយច្បាប់ដោយជំរុញឱ្យរដ្ឋាភិបាលបញ្ចប់សង្រ្គាមនៅតំបន់ហ្កាហ្សាស្ទ្រីបឲ្យបានឆាប់ និងនាំយកការដោះលែងចំណាប់ខ្មាំងអ៊ីស្រាអែលដែលនៅតែឃុំខ្លួននៅទីនោះ។ យោងតាមរបាយការណ៍បានឲ្យដឹងថា ភាគីហត្ថលេខីក៏រួមមានអតីតប្រមុខទីភ្នាក់ងារចារកម្ម Mossad ៣រូប ព្រមទាំងមន្ត្រីជើងចាស់រាប់សិបនាក់ផ្សេងទៀតនៅក្នុងអង្គភាពនេះ។ អតីតសមាជិកទីភ្នាក់ងារចារកម្ម Mossad បាននិយាយថា «ការប្រយុទ្ធគ្នាដែលនៅបន្ត ធ្វើឱ្យមានគ្រោះថ្នាក់ដល់អាយុជីវិតរបស់ចំណាប់ខ្មាំង និងទាហានរបស់យើង ហើយគ្រប់លទ្ធភាពទាំងអស់ត្រូវតែជំរុញដើម្បីឈានដល់កិច្ចព្រមព្រៀងមួយដែលនឹងបញ្ចប់ការឈឺចាប់ទាំងឡាយ។ យើងអំពាវនាវឱ្យរដ្ឋាភិបាលធ្វើការសម្រេចចិត្ត និងមានចំណាត់ការដោយការទទួលខុសត្រូវ សម្រាប់សន្តិសុខរបស់ប្រទេស។ ពួកគេបានបង្ហាញការគាំទ្រដល់សមាជិកកងទ័ពអាកាសរាប់រយនាក់ និងទាហានចូលនិវត្តន៍ ដែលបានចុះហត្ថលេខាលើលិខិតស្រដៀងគ្នានេះ ដោយអំពាវនាវឱ្យបញ្ឈប់អរិភាព និងការវិលត្រឡប់មកវិញនៃចំណាប់ខ្មាំង។

នាយករដ្ឋមន្ត្រីអ៊ីស្រាអែល លោក Benjamin Netanyahu បានគាំទ្រការសម្រេចបណ្តេញចេញ និងបានរិះគន់លិខិតបែបនេះ ដោយហៅអ្នកចុះហត្ថលេខាថាជា «ក្រុមខាងក្រៅជ្រុលនិយម» ដែលប៉ុនប៉ង «បំបែកសង្គមអ៊ីស្រាអែលនៅខាងក្នុង»។

កាលពីថ្ងៃអាទិត្យ ក្រុមគ្រូពេទ្យយោធាអ៊ីស្រាអែលប្រហែល២០០នាក់បានចុះហត្ថលេខាលើញត្តិមួយដោយទាមទារដូចគ្នាសម្រាប់ការបញ្ឈប់ការប្រយុទ្ធ និងនាំយកចំណាប់ខ្មាំងត្រឡប់មកវិញ។