កងពលតូច Al-Qassam ដែលជាស្លាបប្រដាប់អាវុធរបស់ក្រុមហាម៉ាស បានអះអាងកាលពីថ្ងៃអាទិត្យថា អ្នកប្រយុទ្ធរបស់ខ្លួនបានសម្លាប់ និងធ្វើឱ្យទាហានអ៊ីស្រាអែលជាច្រើននាក់រងរបួសនៅក្នុងទីក្រុង Rafah ភាគខាងត្បូងតំបន់ហ្កាហ្សា។ នៅក្នុងសេចក្តីថ្លែងការណ៍មួយ លោក Al-Qassam បាននិយាយថា អ្នកប្រយុទ្ធរបស់ខ្លួន បានបំផ្ទុះលំនៅឋានមួយកន្លែងដោយបានដាក់គ្រឿងផ្ទុះ ដាក់គោលដៅលើអង្គភាពកងកម្លាំងពិសេសរបស់អ៊ីស្រាអែល ដែលបានជ្រៀតចូលតំបន់ Abu al-Rus ភាគខាងកើតទីក្រុង Rafah ។

កងពលតូច ពុំបានបង្ហាញពីចំនួនអ្នកស្លាប់និងរងរបួសនោះទេ ហើយកងទ័ពអ៊ីស្រាអែល ក៏មិនបានចេញការឆ្លើយតបទាក់ទងនឹងការអះអាងនេះដែរ។

ទន្ទឹមនឹងនេះ អ្នកនាំពាក្យកងទ័ពអ៊ីស្រាអែល លោក Avichay Adraee បាននិយាយនៅក្នុងសេចក្តីថ្លែងការណ៍ថា កងទ័ព នៅតែបន្តធ្វើប្រតិបត្តិការនៅតំបន់ហ្កាហ្សាភាគខាងជើង។

យោងតាមលោក Adraee បានឲ្យដឹងថា កងកម្លាំងបានបំផ្លាញផ្លូវរូងក្រោមដីដែលមានប្រវែងប្រហែល ១,២គីឡូម៉ែត្រ និងជម្រៅ២០ ម៉ែត្រ ហើយឃ្លាំងអាវុធមួយកន្លែង ត្រូវបានគេរកឃើញនៅជិតផ្លូវរូងក្រោមដីដែលមានផ្ទុកឧបករណ៍បំផ្ទុះកែច្នៃប្រហែល២០គ្រឿង មីស៊ីលប្រឆាំងរថក្រោះ និងឧបករណ៍ប្រយុទ្ធផ្សេងទៀត។

លោកបាននិយាយបន្ថែមថា ក្នុងអំឡុងពេលប្រតិបត្តិការនេះ យានដ្រូនយោធាបានកំណត់អត្តសញ្ញាណបុគ្គលជាច្រើននាក់ដែលកំពុងដាក់បង្កប់គ្រឿងផ្ទុះនៅជិតកងកម្លាំងអ៊ីស្រាអែល។ ក្រោយមក កងទ័ពអាកាសបានបើកការវាយប្រហារ ដែលតាមសេចក្តីរាយការណ៍ថាបានសម្លាប់មនុស្សច្រើននាក់។