អាជ្ញាធរសុខាភិបាលដែលគ្រប់គ្រងដោយហ៊ួទី បាននិយាយនៅក្នុងសេចក្តីថ្លែងការណ៍មួយ កាលពីថ្ងៃចន្ទថា ជនស៊ីវិលសរុបចំនួន ១២៣ នាក់ បានស្លាប់ និង ២៤៧នាក់ ផ្សេងទៀត បានរងរបួស ដែលភាគច្រើនជាស្ត្រី និងកុមារ ចាប់តាំងពីយោធាសហរដ្ឋអាមេរិក បានបន្តការវាយប្រហារតាមផ្លូវអាកាសឡើងវិញ នៅទូទាំងប្រទេសយេម៉ែន កាលពីពាក់កណ្តាលខែមីនាមក។

សេចក្តីថ្លែងការណ៍នេះ ត្រូវបានចេញផ្សាយ បន្ទាប់ពីការវាយប្រហារតាមអាកាសរបស់សហរដ្ឋអាមេរិកទៅលើរោងចក្រសេរ៉ាមិចមួយ នៅជាយក្រុងភាគខាងលិចនៃរដ្ឋធានី Sanaa របស់ប្រទេសយេម៉ែន កាលពីយប់ថ្ងៃអាទិត្យ ដែលបានសម្លាប់មនុស្ស ៧នាក់ និង ២៩នាក់ រងរបួស។

សេចក្តីថ្លែងការណ៍មុនរបស់អាជ្ញាធរសុខាភិបាលកាលពីថ្ងៃទី ០៩ ខែមេសា បានដាក់ចំនួនអ្នកស្លាប់ពីការវាយឆ្មក់តាមអាកាសជាថ្មីរបស់សហរដ្ឋអាមេរិក គឺ ១០៧នាក់ និងចំនួនអ្នករងរបួសមានចំនួន ២២៣នាក់។

ក្រុមហ៊ួទីកម្របង្ហាញពីចំនួនអ្នកស្លាប់ និងរងរបួសក្នុងចំណោមយុទ្ធជនរបស់ខ្លួនណាស់។ ទោះបីជាយ៉ាងណាក៏ដោយ យោធាអាមេរិក បាននិយាយម្តងហើយម្តងទៀតថា ការវាយប្រហារនេះ បានសម្លាប់មេដឹកនាំ ហ៊ួទីរាប់សិបនាក់ ដែលក្រុមនេះ បានបដិសេធ។

សហរដ្ឋអាមេរិក បានបន្តយុទ្ធនាការផ្លូវអាកាសរបស់ខ្លួនប្រឆាំងនឹងកងកម្លាំងហ៊ួទី នៅថ្ងៃទី ១៥ ខែមីនា ដោយបញ្ជាក់ថា ការវាយប្រហាររបស់ខ្លួន មានគោលបំណងរារាំងក្រុមនេះ ពីការវាយប្រហារប្រឆាំងនឹងគ្រឿងយុទ្ធោបករណ៍កងទ័ពជើងទឹករបស់អ៊ីស្រាអែល និងសហរដ្ឋអាមេរិក នៅក្នុងសមុទ្រក្រហម។