យ៉ាងហោចណាស់មនុស្ស ៥១នាក់ ត្រូវបានសម្លាប់ដោយក្រុមខ្មាន់កាំភ្លើង កាលពីព្រឹកថ្ងៃចន្ទ (ទី១៤ ខែមេសា) ក្នុងរដ្ឋ Plateau ភាគខាងជើង នៃប្រទេសនីហ្សេរីយ៉ា ត្រូវបានបញ្ចុះ នៅក្នុងផ្នូរដ៏ធំមួយ។

អ្នកស្រុកបាននិយាយថា សាកសពចំនួន ៥១នាក់ ត្រូវបានគេរកឃើញ នៅក្នុងភូមិ Zikke និង Kimakpa ក្នុងស្រុក Bassa នៃរដ្ឋ Plateau ខណៈដែលមនុស្សជាច្រើនទៀត ត្រូវបានគេរាយការណ៍ថា បានរង របួស។

កាលពីសប្តាហ៍មុន ទីភ្នាក់ងារសង្គ្រោះជាតិ បាននិយាយថា ខ្មាន់កាំភ្លើង បានសម្លាប់មនុស្សយ៉ាងហោចណាស់ ៥២នាក់ និងបានជម្លៀសមនុស្សជិត ២.000 នាក់ផ្សេងទៀត ក្នុងរយៈពេលប៉ុន្មានថ្ងៃនៃការវាយប្រហារ នៅក្នុងរដ្ឋ Plateau ដែលមានប្រវត្តិនៃអំពើហិង្សារវាងកសិករនិងក្រុមអ្នកឃ្វាលគោ។

អ្នកនាំពាក្យនគរបាល មិនបានធ្វើអត្ថាធិប្បាយភ្លាមៗទេ។

រដ្ឋ Plateau គឺជារដ្ឋមួយក្នុងចំណោមរដ្ឋតំបន់ព្រំដែនចម្រុះជាតិសាសន៍ និងសាសនាជាច្រើន ដែលត្រូវបានគេស្គាល់ថា ជាតំបន់ Middle Belt របស់ប្រទេសនីហ្សេរីយ៉ា ដែលជម្លោះអន្តរសហគមន៍ បានឆក់យកជីវិតមនុស្សរាប់រយនាក់ ក្នុងប៉ុន្មានឆ្នាំថ្មីៗនេះ។