ប្រភពចំនួន ៣ ដែលដឹងពីបញ្ហា កាលពីថ្ងៃអង្គារ (ទី១៥ ខែមេសា) បានប្រាប់ឲ្យដឹងថា រដ្ឋាភិបាលម៉ិកស៊ិកបានបញ្ឈប់ការនាំចូលឥន្ធនៈរបស់សហរដ្ឋអាមេរិកដែលបញ្ជូនចូលប្រទេស តាមផ្លូវគោក ខណៈប្រទេសនេះបង្ក្រាបលើកិច្ចព្រមព្រៀងខុសច្បាប់។

ប្រភពមួយ ក្នុងចំណោមប្រភពទាំងនោះដែលពាក់ព័ន្ធនឹងការដឹកជញ្ជូននេះ បានប្រាប់ថា រថយន្តដឹកប្រេងសាំង និងម៉ាស៊ូតទៅម៉ិកស៊ិកពីមជ្ឈមណ្ឌលចម្រាញ់ឈូងសមុទ្រអាមេរិក មិនត្រូវបានអនុញ្ញាតឲ្យឆ្លងកាត់ព្រំដែនរដ្ឋ Texas ទេ ខណៈរដ្ឋាភិបាលម៉ិកស៊ិកស៊ើបអង្កេតការអនុញ្ញាតនាំចូល និងបង្កើនការត្រួតពិនិត្យដឹកជញ្ជូនទំនិញ។

ប្រភពដដែលនោះបានប្រាប់ទៀតថា មិនមានពេលវេលាកំណត់ ក្នុងការចាប់ផ្ដើមដឹកទំនិញឡើងវិញនោះឡើយ តែបានបន្ថែមថា ការដឹកជញ្ជូនប្រេង តាមផ្លូវដែក និងផ្លូវទឹកទៅកាន់ម៉ិកស៊ិកពីសហរដ្ឋអាមេរិកមិនរងប៉ះពាល់ទេ។ ប្រភពបានស្នើនិយាយដោយមិនបញ្ចេញឈ្មោះ ព្រោះបញ្ហានេះមិនត្រូវបានបង្ហាញជាសាធារណៈទេ។ រដ្ឋាភិបាលម៉ិកស៊ិក និងក្រុមហ៊ុនថាមពលរដ្ឋ Pemex មិនឆ្លើយតបនោះឡើយ ចំពោះសំណើសុំការអត្ថាធិប្បាយ។

បើយោងតាមទិន្នន័យចុងក្រោយបង្អស់របស់រដ្ឋបាលព័ត៌មានថាមពលរបស់សហរដ្ឋអាមេរិក បានឲ្យដឹងថា ម៉ិកស៊ិកជាទិញប្រេងធំជាងគេរបស់អាមេរិក សម្រាប់ការនាំចេញប្រេង និងឥន្ធនៈរបស់សហរដ្ឋអាមេរិកទៅកាន់ប្រទេសនេះ ដែលមានជាមធ្យមប្រហែល ៣៥,៦៦លានបារ៉ែលក្នុងមួយថ្ងៃ ក្នុងខែមករា៕