រដ្ឋមន្ត្រីការពារជាតិអ៊ីស្រាអែល បាននិយាយនៅថ្ងៃពុធនេះថា កងទ័ពនឹងនៅតែស្ថិតក្នុងតំបន់សន្តិសុខដែលគេហៅថា ហ្កាហ្សាស្ទ្រីប លីបង់ និងស៊ីរី ដោយគ្មានកំណត់ពេលជាក់លាក់។

លោក Israel Katz បាននិយាយនៅក្នុងសេចក្តីថ្លែងការណ៍មួយថា៖«មិនដូចកាលពីអតីតកាលទេ (យោធាអ៊ីស្រាអែល) មិនជម្លៀសប្រជាជនចេញពីតំបន់ដែលត្រូវបានបោសសម្អាត និងរឹបអូសនោះទេ» ។ យោធា«នឹងនៅតែស្ថិតក្នុងតំបន់សន្តិសុខ ជាតំបន់ទ្រនាប់រវាងសត្រូវ និងសហគមន៍អ៊ីស្រាអែល ក្នុងស្ថានការណ៍បណ្ដោះអាសន្ន ឬអចិន្ត្រៃយ៍ នៅតំប់ហ្កាហ្សា ដូចនៅលីបង់ និងស៊ីរី»។

កងកម្លាំងអ៊ីស្រាអែល បានកាន់កាប់តំបន់ដ៏ធំនៃតំបន់ហ្កាហ្សា ក្នុងប៉ុន្មានសប្តាហ៍ថ្មីៗនេះ នៅក្នុងយុទ្ធនាការជាថ្មី ដើម្បីដាក់សម្ពាធក្រុមហាម៉ាសឲ្យដោះលែងចំណាប់ថ្នូរ បន្ទាប់ពីអ៊ីស្រាអែល បានបញ្ចប់បទឈប់បាញ់របស់ពួកគេ កាលពីខែមុន។ អ៊ីស្រាអែលក៏បានបដិសេធមិនព្រមដកខ្លួនចេញពីតំបន់មួយចំនួន ក្នុងប្រទេសលីបង់ បន្ទាប់ពីបទឈប់បាញ់ ជាមួយក្រុមសកម្មប្រយុទ្ធហេសបូឡា កាលពីឆ្នាំមុន ហើយខ្លួនបានដណ្តើមយកតំបន់ទ្រនាប់មួយ នៅភាគខាងត្បូងប្រទេសស៊ីរី បន្ទាប់ពីលោកប្រធានាធិបតី បាសា អាល់អាសាដ (Bashar al-Assad) ត្រូវបានផ្តួលរលំ។

អ៊ីស្រាអែលនិយាយថា ខ្លួនត្រូវតែបន្តការគ្រប់គ្រងលើទឹកដីបែបនេះ ដើម្បីទប់ស្កាត់ការកើតឡើងម្តងទៀតនៃការវាយប្រហារ នៅថ្ងៃទី ០៧ ខែតុលា ឆ្នាំ ២០២៣ របស់ក្រុមហាម៉ាស ដែលក្នុងនោះ ក្រុមសកម្មប្រយុទ្ធរាប់ពាន់នាក់ បានសម្រុកចូលទៅក្នុងភាគខាងត្បូងអ៊ីស្រាអែល ពីតំបន់ហ្កាហ្សា។