បើតាមអ្នកនាំពាក្យរបស់ទីភ្នាក់ងារកុមាររបស់អង្គការសហប្រជាជាតិ កាលពីថ្ងៃអង្គារ (ទី១៥ ខែមេសា) បានឲ្យដឹងថា អង្គការយូនីសេហ្វ (UNICEF) បានព្យាករថា ថវិកាឆ្នាំ២០២៦ របស់ខ្លួន នឹងធ្លាក់ចុះយ៉ាងតិច ២០ភាគរយ បើធៀបនឹងឆ្នាំ២០២៤ បន្ទាប់ពីប្រធានាធិបតីអាមេរិក លោក Donald Trump កាត់បន្ថយជំនួយមនុស្សធម៌ជាសាកល។

នៅឆ្នាំ២០២៤ អង្គការយូនីសេហ្វ មានថវិកាចំនួន ៨,៩ពាន់លានដុល្លារ ហើយនៅឆ្នាំនេះ ស្ថាប័ននេះមានថវិកាប្រមាណជា ៨,៥ពាន់លានដុល្លារ។ អ្នកនាំពាក្យរបស់អង្គការយូនីសេហ្វ បាននិយាយថា ការផ្តល់មូលនិធិ សម្រាប់ឆ្នាំ២០២៥ កំពុង «ប្រែប្រួល»។

អ្នកនាំពាក្យរូបនេះ បានប្រាប់ថា៖ «ប៉ុន្មានសប្តាហ៍ចុងក្រោយនេះ បានបញ្ជាក់យ៉ាងច្បាស់ថា អង្គការមនុស្សធម៌ និងអភិវឌ្ឍន៍ ជុំវិញពិភពលោក ក្នុងនោះរួមទាំងអង្គការរបស់អង្គការសហប្រជាជាតិជាច្រើនផងដែរ កំពុងស្ថិតក្នុងវិបត្តិផ្តល់មូលនិធិសកល។ អង្គការយូនីសេហ្វ ក៏មិនត្រូវបានលើកឡើងដែរ»។

យ៉ាងណាក្ដី អង្គការយូនីសេហ្វ មិនបានបញ្ចេញឈ្មោះឲ្យជាក់លាក់ពីសហរដ្ឋអាមេរិកនោះទេ ប៉ុន្តែទីក្រុងវ៉ាស៊ីនតោន គឺជាអ្នកផ្តល់ជំនួយដ៏ធំបំផុតរបស់ទីភ្នាក់ងារនេះជាយូរមកហើយ ដោយបានរួមចំណែកជាង ៨០០លានដុល្លារ ក្នុងឆ្នាំ២០២៤។ ចាប់តាំងពីអង្គការយូនីសេហ្វ ត្រូវបានបង្កើតឡើងក្នុងឆ្នាំ១៩៤៦ នាយកប្រតិបត្តិទាំងអស់ គឺជាជនជាតិអាមេរិក។

អ្នកនាំពាក្យរបស់អង្គការយូនីសេហ្វ បានបញ្ជាក់បន្ថែមថា៖ «នៅពេលនេះ យើងកំពុងព្យាករជាដំបូងថា ធនធានហិរញ្ញវត្ថុរបស់យើង នឹងមានយ៉ាងហោចណាស់តិចជាង ២០ភាគរយនៃកម្រិតទូទាំងអង្គការ នៅឆ្នាំ២០២៦ បើធៀបនឹងឆ្នាំ២០២៤»៕