អ៊ីស្រាអែល បានប្រកាសកាលពីថ្ងៃពុធ ទី១៦ មេសា ថា ខ្លួនបានប្រែក្លាយដែនដីហ្កាហ្សា៣០ភាគរយទៅជាតំបន់ទ្រនាប់ ខណៈខ្លួនបានសម្រុកវាយលុកដោយយោធាឥតឈប់ឈរ និងបិទផ្លូវសម្រាប់ជំនួយមនុស្សធម៌ចូលទៅកាន់ដែនដីដែលត្រូវបំផ្លិចបំផ្លាញដោយសង្រ្គាម។ អ៊ីស្រាអែល បានបន្តការវាយលុកតាមអាកាស និងដីគោក នៅទូទាំងតំបន់ហ្កាហ្សាស្ទ្រីប នៅថ្ងៃទី១៨ ខែមីនា ដោយបញ្ចប់បទឈប់បាញ់រយៈពេលពីរខែជាមួយក្រុមហាម៉ាស ដោយក្រុមអ្នកជួយសង្គ្រោះបាននិយាយថា មនុស្សរាប់សិបនាក់បានស្លាប់ ក្នុងការវាយប្រហារនៅទូទាំងដែនដីដីប៉ាឡេស្ទីន។

អង្គការសហប្រជាជាតិបាននិយាយថា ពលរដ្ឋប៉ាឡេស្ទីនប្រមាណ ៥០០.០០០នាក់ បានភៀសខ្លួនចេញចាប់តាំងពីការបញ្ចប់បទឈប់បាញ់នៅតំបន់ហ្កាហ្សា បង្កជាអ្វីត្រូវបានគេចាត់ទុកថាជាវិបត្តិមនុស្សធម៌ធ្ងន់ធ្ងរបំផុតមួយដែលដែនដីនេះពុំធ្លាប់ជួបប្រទះក្នុងរយៈពេលជាង១៨ខែនៃសង្គ្រាម។

យោធាអ៊ីស្រាអែល កាលពីថ្ងៃពុធបាននិយាយថា ជាផ្នែកនៃប្រតិបត្តិការឡើងវិញរបស់ខ្លួន អ៊ីស្រាអែល «ទទួលបានការគ្រប់គ្រងប្រតិបត្តិការពេញលេញលើតំបន់ និងផ្លូវសំខាន់ៗមួយចំនួន នៅទូទាំងតំបន់ហ្កាហ្សាស្ទ្រីប» ហើយប្រហែល៣០ភាគរយនៃដែនដីហ្កាហ្សាបច្ចុប្បន្ននេះ ត្រូវបានគេកំណត់ថាជាតំបន់ប្រតិបត្តិការសន្តិសុខ។ ការវាយប្រហារតាមអាកាសរបស់អ៊ីស្រាអែល បានវាយលុកលើ «គោលដៅភេរវកម្មប្រហែល ១.២០០កន្លែង»។

រដ្ឋមន្ត្រីការពារជាតិ លោក Israel Katz បានប្រកាសកាលពីដើមខែនេះថា យោធាកំពុងដណ្តើមយក «តំបន់ធំ» នៃតំបន់ហ្កាហ្សា ដោយធ្វើឱ្យតំបន់នេះ «កាន់តែតូច និងនៅឯកោ»។

មន្ត្រីជាន់ខ្ពស់អ៊ីស្រាអែលបាននិយាយដដែលៗថា សម្ពាធយោធាគឺជាមធ្យោបាយតែមួយគត់ដើម្បីបង្ខំក្រុមហាម៉ាសឱ្យដោះលែងចំណាប់ខ្មាំង៥៨នាក់ដែលនៅតែត្រូវបានឃុំខ្លួននៅតំបន់ហ្កាហ្សា។