រដ្ឋមន្ត្រីការពារជាតិអ៊ីស្រាអែល បាននិយាយកាលពីថ្ងៃពុធ (១៦ មេសា) ថា កងទ័ពរបស់ខ្លួននឹងនៅតែស្ថិតក្នុងតំបន់សន្តិសុខ នៅដែនដីហ្កាហ្សា ប្រទេសលីបង់ និងស៊ីរី ដោយគ្មានកំណត់ ដែលអាចបង្កភាពស្មុគស្មាញដល់កិច្ចពិភាក្សាជាមួយក្រុមហាម៉ាស ជុំវិញបទឈប់បាញ់ និងការដោះលែងចំណាប់ថ្នូរ។

រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយក្នុងសេចក្តីថ្លែងការណ៍មួយថា "មិនដូចកាលពីមុនទេ ពេលនេះយោធាអ៊ីស្រាអែល មិនជម្លៀសចេញពីតំបន់ដែលត្រូវឈូសឆាយ និងរឹបអូសឡើយ ហើយយោធានឹងបន្តស្ថិតក្នុងតំបន់សន្តិសុខដើម្បីជាទ្រនាប់រវាងសត្រូវ និងសហគមន៍អ៊ីស្រាអែល ក្នុងស្ថានការណ៍បណ្ដោះអាសន្ន ឬអចិន្ត្រៃយ៍នៅហ្កាហ្សា ដូចនៅលីបង់ និងស៊ីរី"។

ទន្ទឹមនឹងនេះ មន្ត្រីសុខាភិបាលក្នុងតំបន់និយាយថា ការវាយប្រហាររបស់អ៊ីស្រាអែល នៅទូទាំងតំបន់ហ្កាហ្សា បានសម្លាប់មនុស្សរាប់សិបនាក់។ កងកម្លាំងអ៊ីស្រាអែល បានកាន់កាប់ជាងពាក់កណ្តាលនៃតំបន់ហ្កាហ្សា នៅក្នុងយុទ្ធនាការជាថ្មីដើម្បីដាក់សម្ពាធលើក្រុមសកម្មប្រយុទ្ធហាម៉ាស ឱ្យដោះលែងចំណាប់ថ្នូរ បន្ទាប់ពីអ៊ីស្រាអែល បានបញ្ចប់បទឈប់បាញ់របស់ពួកគេកាលពីខែមុន។

អ៊ីស្រាអែលក៏បដិសេធមិនព្រមដកកម្លាំងចេញពីតំបន់មួយចំនួននៅលីបង់ បន្ទាប់ពីបទឈប់បាញ់ជាមួយក្រុមសកម្មប្រយុទ្ធហេសបូឡា កាលពីឆ្នាំមុន ហើយបានដណ្តើមយកតំបន់ទ្រនាប់មួយនៅភាគខាងត្បូងស៊ីរី បន្ទាប់ពីពួកឧទ្ទាមបានផ្តួលរំលំលោកប្រធានាធិបតីស៊ីរី Bashar Assad កាលពីខែធ្នូ។

គួរឱ្យដឹងថា អាជ្ញាធរប៉ាឡេស្ទីន និងប្រទេសជិតខាងទាំងពីរ ចាត់ទុកវត្តមានទាហានអ៊ីស្រាអែល ថាជាការកាន់កាប់យោធា ដោយបំពានច្បាប់អន្តរជាតិ៕