លោកប្រធានាធិបតីចិន Xi Jinping បានសន្យារួមដៃជាមួយប្រទេសម៉ាឡេស៊ី និងតំបន់អាស៊ីអាគ្នេយ៍ដ៏ទូលំទូលាយក្នុងការទប់ទល់នឹងឯកតោភាគីនិយម និងគាំពារនិយមនៃសង្រ្គាមពន្ធរបស់ប្រធានាធិបតីអាមេរិក Donald Trump ។

ថ្លែងនៅក្នុងពិធីស្វាគមន៍ទទួលទានអាហារពេលល្ងាច អំឡុងដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសម៉ាឡេស៊ីកាលពីថ្ងៃទី ១៦ ខែមេសា លោក Xi បានសង្កត់ធ្ងន់លើសារៈសំខាន់នៃការរួបរួមក្នុងការថែរក្សាអនាគតរួមគ្នានៃ "គ្រួសារអាស៊ី" ។

ប្រធានាធិបតីចិនបាននិយាយថា នៅក្នុងការប្រឈមចំពោះភាពតក់ស្លុតជាសកល និងការប្រឈមចំពោះសកលភាវូបនីយកម្មសេដ្ឋកិច្ច ប្រទេសចិន និងម៉ាឡេស៊ីនឹងឈររួមគ្នាជាមួយបណ្តាប្រទេសក្នុងតំបន់ដើម្បីទប់ទល់នឹងជំនោរនៃការប្រកួតប្រជែងភូមិសាស្ត្រនយោបាយ និងការប្រឈមដាក់គ្នាតាមប្លុក ក៏ដូចជាប្រតិកម្មនៃលទ្ធិឯកតោភាគីនិយម និងគាំពារនិយម។

ការអត្ថាធិប្បាយរបស់លោកត្រូវបានគាំទ្រដោយនាយករដ្ឋមន្ត្រីម៉ាឡេស៊ីលោក Anwar Ibrahim ដែលបានកោតសរសើរពីវិធីសាស្រ្តសំឡឹងវែងឆ្ងាយរបស់ប្រទេសចិន ផ្ទុយពីអ្វីដែលលោកបានហៅជាការសំឡឹងឃើញខ្លីពីគូប្រជែងដែលត្រូវបានឃើញនៅតំបន់ផ្សេងទៀត។

ដំណើរទស្សនកិច្ចរយៈពេលបីថ្ងៃរបស់លោក Xi ទៅកាន់ប្រទេសម៉ាឡេស៊ីកើតឡើងតែប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិកបានប្រកាសភ្លាមៗនូវការផ្អាករយៈពេល៩០ ថ្ងៃលើការដំឡើងពន្ធបដិការ លើការនាំចូលពីប្រទេសភាគច្រើន ខណៈដំឡើងពន្ធលើការនាំចូលរបស់ចិន ឡើងដល់១៤៥%។ ទីក្រុងប៉េកាំងបានឆ្លើយតបជាមួយនឹងការដំឡើងពន្ធសងសឹកជាប់ៗគ្នាលើការនាំចេញរបស់អាមេរិក៕