បាល់ទាត់៖ ក្រុមជម្រើសជាតិសិង្ហបុរីរកបាន ៣ពិន្ទុពីថ្ងៃបើកឆាកការប្រកួតកីឡាបាល់ទាត់ពានរង្វាន់តំបន់អាស៊ីអាគ្នេយ៍ ២០២០ ពូល A ក្រោយឈ្នះសហភាពមីយ៉ាន់ម៉ា ៣ទល់នឹង០ នៅពហុកីឡដ្ឋានជាតិសិង្ហបុរី។ លេងបានត្រឹមតែ ៣៤នាទី ម្ចាស់ផ្ទះសិង្ហបុរីនាំមុខមុនពេលដែលកីឡាករ Safuwan Baharudin តែតបញ្ចូលទីបានសម្រេច។ ៥នាទីបន្ទាប់ម្ចាស់អាវលេខ៩ កីឡាករ Ikhsan Fandi ស៊ុតបញ្ចូលទីគ្រាប់បាល់ទីពីរឱ្យជើងឯកបួនសម័យសិង្ហបុរី។
ជិតចប់តង់ទី១ ទៅហើយកីឡាកររូបនេះដដែលបន្ថែមគ្រាប់ទី២ របស់ខ្លួននឹងជាគ្រាប់ទី៣ ឱ្យម្ចាស់ផ្ទះ។ ៤៥នាទីចុងក្រោយក្រុងទាំងពីរមិនអាចរកគ្រាប់បាល់បានទៀតទេ។ ចប់ការប្រកួតសិង្ហបុរីឈ្នះ ៣ទល់នឹង០។ ក្នុងសន្និសីទសារព័ត៌មាន គ្រូបង្គោលសិង្ហបុរីលោក Tatsuma Yoshida បានបញ្ជាក់ដោយមោទនភាពចំពោះទម្រង់លេងរបស់កូនក្រុម ប៉ុន្តែត្រូវលេងឱ្យល្អជាងនេះទៀតសម្រាប់ប្រកួតបន្ទាប់។ ថ្ងៃទី៨ ខែធ្នូ ក្រុមជម្រើសជាតិសិង្ហបុរីត្រូវប្រកួតជាមួយហ្វីលីពីន។ រីឯគ្រូបង្វឹកសហភាពមីយ៉ាន់ម៉ាលោក Antoine Hey លើកឡើងថា ដូចអ្នកដឹងក្រុមរបស់លោកមិនសមចាញ់ទេ។ ជារួមវាជាកំហុសរបស់យើងដែលមិនអាចរៀបចំទាន់ពេល ជាមួយហេតុមួយចំនួនដែលសហភាពមីយ៉ាន់ម៉ាពើបប្រទះ។ ប្រកួតបន្ទាប់ថ្ងៃទី៨ ខែធ្នូ សហភាពមីយ៉ាន់ត្រូវប៉ះទីម័រខាងកើត៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
