មន្រ្តីជំនិតសន្តិសុខជាតិជាន់ខ្ពស់ពីររូបរបស់លោកប្រធានាធិបតីអាមេរិក Donald Trump គ្រោងនឹងជួបពិភាក្សានៅទីក្រុងប៉ារីស ជាមួយប្រធានាធិបតីបារាំង លោក Emmanuel Macron នៅថ្ងៃព្រហស្បតិ៍ (១៧ មេសា) នេះ ខណៈទីក្រុងវ៉ាស៊ីនតោន និងអឺរ៉ុប ស្វះស្វែងរកមូលដ្ឋានរួមគ្នា ក្នុងការបញ្ចប់សង្រ្គាមអ៊ុយក្រែន និងបញ្ចៀសជម្លោះអ៊ីរ៉ង់។

មន្រ្តីជាន់ខ្ពស់ទាំងពីររូបនោះ គឺរដ្ឋមន្រ្តីការបរទេសអាមេរិក លោក Marco Rubio និងប្រេសិតពិសេស លោក Steve Witkoff ត្រូវបានគេរំពឹងថានឹងទទួលស្តាប់ក្ដីបារម្ភរបស់អឺរ៉ុប អំពីរុស្ស៊ី ស្របពេលអាមេរិក ប៉ុនប៉ងរៀបចំបទឈប់បាញ់ដ៏ស្មុគស្មាញមួយនៅអ៊ុយក្រែន រយៈពេល ៣ឆ្នាំបន្ទាប់ពីរុស្ស៊ី បើកប្រតិបត្តិការយោធាពិសេសលើអ្នកជិតខាងរបស់ខ្លួន។

គួរឱ្យដឹងថា លោក Trump បានខកចិត្តកាន់តែខ្លាំងឡើងជាមួយរុស្ស៊ី និងអ៊ុយក្រែន ជុំវិញការបង្ហូរឈាមដែលកំពុងបន្តរវាងភាគីជម្លោះទាំងពីរ ហើយលោកបាននិងកំពុងគំរាមកំហែងសកម្មភាពយោធាប្រឆាំងនឹងរោងចក្រនុយក្លេអ៊ែរអ៊ីរ៉ង់ ប្រសិនបើកិច្ចព្រមព្រៀងមួយមិនបានឈានដល់ជុំវិញកម្មវិធីនុយក្លេអ៊ែររបស់អ៊ីរ៉ង់។

មេដឹកនាំអឺរ៉ុបក៏កាន់តែបារម្ភកាន់តែខ្លាំងថែមទៀត នៅពេលលោក Trump រួសរាយផ្នែកការទូតទៅកាន់រុស្ស៊ី និងដាក់សម្ពាធលើអ៊ុយក្រែន។ ក្រៅពីជំនួបជាមួយលោក Macron ក្រសួងការបរទេសបារាំងបាននិយាយថា លោក Rubio ក៏នឹងជួបសមភាគីបារាំង ដើម្បីពិភាក្សាពីរឿងអ៊ុយក្រែន និងចក្ខុវិស័យសម្រាប់កិច្ចព្រមព្រៀងនុយក្លេអ៊ែរអ៊ីរ៉ង់ថ្មី ព្រមទាំងជម្លោះមជ្ឈិមបូព៌ាផងដែរ៕