រដ្ឋាភិបាលប្រទេសកូឡុំប៊ី បានប្រកាសអាសន្នផ្នែកសុខភាពទូទាំងប្រទេសកាលពីល្ងាចថ្ងៃពុធ (១៦ មេសា) ដោយសារការកើនឡើងនៃករណីជំងឺខាន់លឿង ហៅហៅថា គ្រុនលឿង។

រដ្ឋមន្ត្រីសុខាភិបាល លោក Guillermo Alfonso Jaramillo បាននិយាយថា ការផ្ទុះឡើងនៃជំងឺនេះ បានបណ្តាលឱ្យមានករណីឆ្លងចំនួន ៧៤នាក់ ដែលត្រូវបានបញ្ជាក់ និងមានអ្នកស្លាប់ចំនួន ៣៤នាក់ ចាប់តាំងពីដើមឆ្នាំមុនមក។ លោក Jaramillo បន្ថែមថា ស្ថានភាពធ្ងន់ធ្ងរបំផុតគឺនៅតំបន់ Tolima ក្នុងតំបន់កណ្តាលភាគខាងលិចប្រទេសកូឡុំប៊ី ដែលមានករណីចំនួន ២២នាក់ ត្រូវបានរកឃើញ។

គួរឱ្យដឹងថា ជំងឺខាន់លឿង ឬគ្រុនលឿងនេះ ជាមេរោគឆ្លងទៅមនុស្សដោយការខាំរបស់មូសប្រភេទ Aedes និង Haemagogus ហើយជាធម្មតាកើតមានឡើងរយៈពេលខ្លី។ នៅក្នុងករណីភាគច្រើន រោគសញ្ញានៃជំងឺនេះរួមមានគ្រុនក្តៅ រងាញាក់ បាត់បង់ចំណង់អាហារ ចង្អោរ ឈឺសាច់ដុំ ជាពិសេសនៅផ្នែកខ្នង និងឈឺក្បាល ខណៈការស្លាប់កើតឡើងចំពោះពាក់កណ្តាលនៃអ្នកឆ្លងដែលមានជំងឺធ្ងន់ធ្ងរ។

ជំងឺនេះជារឿងធម្មតានៅក្នុងតំបន់ត្រូពិកនៃទ្វីបអាមេរិកខាងត្បូង និងអាហ្វ្រិក ប៉ុន្តែមិនមែនធម្មតានៅអាស៊ីទេ។ ក្នុងឆ្នាំ២០១៣ ជំងឺគ្រុនលឿងនេះត្រូវប៉ាន់ប្រមាណថាបានបណ្តាលឱ្យមានការឆ្លងធ្ងន់ធ្ងរចំនួន ១៣០.០០០នាក់ និងមនុស្ស ៧៨.០០០នាក់បានស្លាប់នៅក្នុងទ្វីបអាហ្រ្វិក៕