ប្រទេសចិននឹងកោះប្រជុំក្រុមប្រឹក្សាសន្តិសុខអង្គការសហប្រជាជាតិ (UNSC) នៅសប្តាហ៍ក្រោយ ដើម្បីចោទប្រកាន់សហរដ្ឋអាមេរិកថា បានសម្លុតកំហែង និង «បង្កការរំខានដល់កិច្ចប្រឹងប្រែងសកល ដើម្បីឲ្យមានសន្តិភាព និងការអភិវឌ្ឍ» ដោយការយពន្ធជាអាវុធ។

ចំណាត់ការនេះកើតមានឡើងនៅពេលដែលក្រុងប៉េកាំងបន្តប្រកាន់ជំហរមិនចុះញ៉ម នៅក្នុងសង្គ្រាមពាណិជ្ជកម្មដែលកាន់តែឡើងកម្ដៅខ្លាំងទៅៗជាមួយក្រុងវ៉ាស៊ីនតោន ជាបញ្ហាដែលបង្កឡើងដោយការដាក់អត្រាពន្ធយ៉ាងធ្ងន់ធ្ងររបស់លោកប្រធានាធិបតីអាមេរិក Donald Trump លើទំនិញដែលនាំចូលពីប្រទេសចិន។

ដើម្បីកោះប្រជុំក្រៅផ្លូវការរបស់អង្គការសហប្រជាជាតិ ស្តីពី «ផលប៉ះពាល់ពីលទ្ធិជាឯកតោភាគី និងការអនុវត្តការគំរាមកំហែងលើទំនាក់ទំនងអន្តរជាតិ» ឯកសារបង្ហាញពីគោលគំនិតនេះ បានរៀបរាប់ថា «ប្រទេសទាំងអស់ ជាពិសេសប្រទេសកំពុងអភិវឌ្ឍន៍ គឺជាជនរងគ្រោះនៃការអនុវត្តឯកតោភាគី និងការអនុវត្តការគំរាមកំហែងនេះ»។

ឯកសារខ្លីដែលបានអញ្ជើញប្រទេសសមាជិកអង្គការសហប្រជាជាតិទាំង ១៩៣ ឲ្យចូលរួមកិច្ចប្រជុំថ្ងៃទី២៣ ខែមេសា បានរិះគន់សហរដ្ឋអាមេរិកជាពិសេស ចំពោះការដំឡើងអត្រាពន្ធនេះ។

ឯកសារបង្ហាញពីគោលគំនិតនោះ បានបន្ថែមថា៖ «តាមរយៈការយកពន្ធជាអាវុធ ដើម្បីធ្វើជាឧបករណ៍ដាក់សម្ពាធយ៉ាងខ្លាំងក្លា សហរដ្ឋអាមេរិកបានបំពានយ៉ាងធ្ងន់ធ្ងរលើច្បាប់ពាណិជ្ជកម្មអន្តរជាតិ ហើយបានបង្កឲ្យមានផលប៉ះពាល់ និងភាពចលាចលយ៉ាងធ្ងន់ធ្ងរដល់សេដ្ឋកិច្ចពិភពលោក និងប្រព័ន្ធពាណិជ្ជកម្មពហុភាគី ដោយធ្វើឲ្យមានការរំខានល់កិច្ចប្រឹងប្រែងសកល ដើម្បីឲ្យមានសន្តិភាព និងការអភិវឌ្ឍ»៕