២ខែបន្ទាប់ពី DeepSeek ដែលជាក្រុមហ៊ុនបញ្ញាសិប្បនិម្មិត (AI) ដ៏លេចធ្លោរបស់ចិន បានអង្រួនទីក្រុងវ៉ាស៊ីនតោន និងធ្វើឲ្យផ្សារហ៊ុន Wall Street រង្គោះរង្គើនោះ មន្ត្រីអាមេរិកកំពុងចាត់វិធានការ ដើម្បីបង្ក្រាបលើក្រុមហ៊ុនរបស់ចិននេះ និងរារាំងការគាំទ្រ ចំពោះក្រុមហ៊ុននេះ ដោយក្រុមហ៊ុនផលិតបន្ទះឈីបឈានមុខគេរបស់អាមេរិក គឺ Nvidia។

រដ្ឋបាលរបស់ប្រធានាធិបតី លោក Donald Trump នៅសប្តាហ៍នេះ បានចាត់វិធានការ ដើម្បីរឹតបន្តឹងការលក់របស់ក្រុមហ៊ុន Nvidia នូវបន្ទះឈីប AI ទៅឲ្យប្រទេសចិន។ ដោយបាននិយាយក្នុងលក្ខខណ្ឌមិនបញ្ចេញឈ្មោះ បុគ្គល ៣នាក់ដែលដឹងអំពីចំណាត់ការនេះ បានឲ្យដឹងថា រដ្ឋបាលក៏កំពុងថ្លឹងថ្លែងការពិន័យនានា ដែលនឹងរារាំងក្រុមហ៊ុន DeepSeek កុំឲ្យទិញបច្ចេកវិទ្យារបស់សហរដ្ឋអាមេរិក និងកំពុងជជែកដេញដោលរារាំងការចូលប្រើប្រាស់សេវាកម្មរបស់ជនជាតិអាមេរិក។ ថ្នាក់ដឹកនាំសភា ក៏កំពុងដាក់សម្ពាធលើក្រុមហ៊ុន Nvidia ផងដែរ។

កាលពីថ្ងៃពុធ (ទី១៦ ខែមេសា) គណៈកម្មាធិការពិសេសសភា បានបើកការស៊ើបអង្កេតលើការលក់បន្ទះឈីបរបស់ក្រុមហ៊ុន Nvidia នៅទូទាំងអាស៊ី។ គណៈកម្មាធិការនេះ កំពុងព្យាយាមវាយតម្លៃថា តើក្រុមហ៊ុនផលិតបន្ទះឈីបរបស់សហរដ្ឋអាមេរិក បានផ្តល់ឲ្យក្រុមហ៊ុន DeepSeek ដោយចេតនាជាមួយនឹងបច្ចេកវិទ្យាសំខាន់ៗ ដើម្បីអភិវឌ្ឍ AI ដែលអាចបំពានច្បាប់របស់សហរដ្ឋអាមេរិកដែរ ឬទេ។

នេះគឺជាការស៊ើបអង្កេតរបស់សភាលើកដំបូងលើអាជីវកម្មរបស់ក្រុមហ៊ុន Nvidia។ វាកើតមានឡើងនៅពេលដែលរដ្ឋបាលរបស់លោក Trump ប្រយុទ្ធប្រឆាំងជាមួយរបៀបអនុវត្តច្បាប់សម័យរបស់លោក Joe Biden កម្រិតចំនួនបន្ទះឈីប AI ដែលក្រុមហ៊ុនអាចបញ្ជូនទៅកាន់ប្រទេសផ្សេងៗ៕