សហភាពអឺរ៉ុប (EU) កាលពីថ្ងៃពុធ (ទី១៦ ខែមេសា) បានចេញផ្សាយបញ្ជីប្រទេសចំនួន ៧ ដែលខ្លួនចាត់ទុកថា «មានសុវត្ថិភាព» ក្នុងគោលបំណងពន្លឿនដល់ការបញ្ជូនត្រលប់នូវជនអន្តោប្រវេសន៍ទៅកាន់ប្រទេសដើមវិញ ដែលធ្វើឲ្យកាន់តែពិបាកសម្រាប់ពលរដ្ឋនៃប្រទេសទាំងនោះ ក្នុងការសុំសិទ្ធិជ្រកកោន នៅក្នុងប្លុកនេះ។

បញ្ជីឈ្មោះប្រទេសដែលរួមមានកូសូវ៉ូ បង់ក្លាដែស កូឡុំប៊ី អេហ្ស៊ីប ឥណ្ឌា ម៉ារ៉ុក និងទុយនេស៊ី នឹងត្រូវការការអនុម័តពីសភា និងសមាជិកនៃប្លុកនេះ មុនពេលចូលជាធរមាន។

ចំណាត់ការនេះដែលត្រូវបានរិះគន់ដោយក្រុមសិទ្ធិមនុស្ស នឹងអនុញ្ញាតឲ្យរដ្ឋាភិបាល EU ដំណើរការពាក្យសុំសិទ្ធិជ្រកកោនដែលដាក់ពីពលរដ្ឋនៃប្រទេសទាំងនោះបានលឿនជាងមុន ដោយបង្ហាញការសន្មតថា ការទាមទារបែបនេះមិនមានលក្ខណសម្បត្តិគ្រប់គ្រាន់។

លោក Magnus Brunner ស្នងការទទួលបន្ទុកទេសន្តរប្រវេសន៍របស់ EU បានលើកឡើងថា៖ «រដ្ឋជាសមាជិកជាច្រើន កំពុងប្រឈមនឹងបញ្ហានៃការស្នើសុំសិទ្ធិជ្រកកោនច្រើនលើសលប់ ដូច្នេះអ្វីដែលយើងអាចធ្វើបានឥឡូវនេះ ដើម្បីគាំទ្រដល់ការសម្រេចឲ្យបានលឿន ជុំវិញការសុំសិទ្ធិជ្រកកោន គឺជាកិច្ចការចាំបាច់»។

ទីក្រុងប្រ៊ុចសែលបាននិងកំពុងស្ថិតក្រោមសម្ពាធ ក្នុងការទប់ស្កាត់ការមកដល់របស់ជនអន្តោប្រវេសន៍ និងជួយសម្រួលដល់ការនិរទេស បន្ទាប់ពីមានការបញ្ចេញមតិសាធារណៈ អំពីបញ្ហាអន្តោប្រវេសន៍ ដែលថា បានជំរុញឲ្យមានការកើនឡើងនូវការបោះឆ្នោតគាំទ្រដល់ក្រុមស្ដាំនិយមជ្រុលនៅក្នុងប្រទេសមួយចំនួន៕