អ្នកនាំពាក្យរបស់សភា នៅថ្ងៃព្រហស្បតិ៍ (ទី១៧ ខែមេសា) នេះ បានប្រាប់ឲ្យដឹងថា សភាអាល្លឺម៉ង់មិនបានដាក់បញ្ចូលឯកអគ្គរដ្ឋទូតរុស្ស៊ី និងបេឡារុសក្នុងបញ្ជីឈ្មោះដែលត្រូវអញ្ជើញឲ្យចូលរួមក្នុងព្រឹត្តិការណ៍ពិសេស នាថ្ងៃទី៨ ខែឧសភា ដើម្បីរំលឹកខួបលើកទី៨០ នៃការបញ្ចប់សង្គ្រាមលោកលើកទី២ នៅអឺរ៉ុប។

ការសម្រេចនេះបង្ហាញពីភាពមិនស្រណុកចិត្ត នៅក្នុងប្រទេសអាល្លឺម៉ង់ អំពីរបៀបទទួលស្គាល់តួនាទីរបស់រុស្ស៊ី ក្នុងការរំដោះអឺរ៉ុបពីភេរវកម្មរបស់ណាស៊ី អំឡុងឆ្នាំគម្រប់ខួបដែលប្រធានាធិបតី លោក Vladimir Putin បានទាញយកប្រវត្តិសាស្ត្រនៃសង្គ្រាមលោកលើកទី២ ដើម្បីបង្ហាញអំពីភាពត្រឹមត្រូវនៃការលុកលុយរបស់លោកលើប្រទេសអ៊ុយក្រែន។

អ្នកនាំពាក្យរបស់សភា Bundestag បានសំដៅទៅលើការវាយតម្លៃរបស់រដ្ឋាភិបាលសហព័ន្ធ នៅក្នុងសេចក្តីថ្លែងការណ៍មួយ ដោយពន្យល់ពីចំណាត់ការនេះថា «ការវាយតម្លៃបាននាំឲ្យឯកអគ្គរដ្ឋទូតនៃសហព័ន្ធរុស្ស៊ី និងបេឡារុស ក្នុងចំណោមឥស្សរជនផ្សេងទៀតមិនត្រូវបានអញ្ជើញនោះឡើយ»។

តំណាងស្ថានទូតផ្សេងទៀត នឹងចូលរួមជាមួយសមាជិកសភាអាល្លឺម៉ង់ សម្រាប់ព្រឹត្តិការណ៍ នៅក្នុងបន្ទប់ប្រជុំដ៏ធំរបស់រដ្ឋសភា Bundestag ដែលនឹងរំលឹកដល់ការបញ្ចប់សង្គ្រាម ហើយជាមួយនឹងលទ្ធផលនាពេលនោះ ក៏មាននូវការរំលឹកផងដែរដល់ការបញ្ចប់យុទ្ធនាការហិង្សា និងអំពើប្រល័យពូជសាសន៍របស់ណាស៊ីអាល្លឺម៉ង់ នៅអឺរ៉ុប។ អ្នកនាំពាក្យរូបនេះបានបញ្ជាក់បន្ថែមថា ភ្ញៀវមកពីបរទេសមិនត្រូវបានអញ្ជើញឲ្យចូលរួមឡើយ៕