ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃព្រហស្បតិ៍ បានចោទប្រកាន់បេសកជនសហរដ្ឋអាមេរិក លោក Steve Witkoff ពីការ «ផ្សព្វផ្សាយនិទានកថារបស់រុស្ស៊ី» បន្ទាប់ពីលោកបាននិយាយថា កិច្ចព្រមព្រៀងសន្តិភាពជាមួយរុស្ស៊ី អាស្រ័យលើស្ថានភាពនៃទឹកដីកាន់កាប់របស់អ៊ុយក្រែន។

លោក Witkoff បានជួបជាមួយលោក Vladimir Putin ក្នុងទីក្រុង Saint Petersburg កាលពីថ្ងៃសុក្រសប្តាហ៍មុន ជាជំនួបលើកទីបីរបស់លោកជាមួយមេដឹកនាំរុស្ស៊ីក្នុងរយៈពេលពីរខែ ខណៈប្រធានាធិបតីសហរដ្ឋអាមេរិក លោក Donald Trump បានបង្កើនកិច្ចខិតខំប្រឹងប្រែងដើម្បីសម្របសម្រួលបទឈប់បាញ់នៅក្នុងសង្រ្គាមរយៈពេលបីឆ្នាំមកនេះ។

លោក Zelenskiy បានប្រាប់អ្នកសារព័ត៌មានថា «ខ្ញុំជឿថា លោក Witkoff បានទទួលយកយុទ្ធសាស្ត្ររបស់ភាគីរុស្ស៊ី។ ខ្ញុំគិតថាវាមានគ្រោះថ្នាក់ខ្លាំង ដោយកំពុងតែផ្សព្វផ្សាយនិទានកថារបស់រុស្ស៊ី»។

លោក Zelenskiy និយាយបន្ថែមថា «ខ្ញុំមិនបានមើលឃើញលោក Witkoff មានការតព្វកិច្ចដើម្បីពិភាក្សាអំពីទឹកដីអ៊ុយក្រែននោះទេ ព្រោះទឹកដីរបស់យើងជារបស់ប្រជាជនយើង មិនត្រឹមតែរបស់យើងប៉ុណ្ណោះទេ ប៉ុន្តែថែមទាំងសម្រាប់អនាគតរបស់ប្រជាជនអ៊ុយក្រែន។ ដូច្នេះខ្ញុំមិនយល់ពីអ្វីដែលលោក Witkoff កំពុងតែលើកយកមកនិយាយនោះទេ។

លោក Witkoff បានប្រាប់សារព័ត៌មាន Fox News ថា ដំណោះស្រាយសន្តិភាពមួយស្ថិតនៅលើ «អ្វីដែលគេហៅថា ដែនដីចំនួនប្រាំតំបន់» ជាតំបន់របស់អ៊ុយក្រែនមាន Donetsk, Lugansk, Zaporizhzhia, Kherson និង តំបន់គ្រីម៉េ ដែលរុស្ស៊ីអះអាងថា បានបញ្ចូលជាឧបសម្ព័ន្ធ។