ព្រះចៅ Sheikh Tamim bin Hamad Al-Thani នៃប្រទេសកាតា បានមានបន្ទូលប្រាប់ប្រធានាធិបតីរុស្ស៊ី លោក Vladimir Putin ក្នុងកិច្ចពិភាក្សានៅវិមានក្រឹមឡាំង កាលពីថ្ងៃព្រហស្បតិ៍ (១៧ មេសា) ថា មេដឹកនាំថ្មីរបស់ស៊ីរី មានចំណាប់អារម្មណ៍ចង់កសាងទំនាក់ទំនងជាមួយទីក្រុងមូស្គូ។

ការធានាពីព្រះអង្គម្ចាស់ Sheikh Tamim កើតឡើងនៅពេលលោក Putin ព្យាយាមរក្សាការប្រើប្រាស់មូលដ្ឋានយោធាពីរកន្លែងរបស់រុស្ស៊ី នៅស៊ីរី និងបញ្ចៀសការប៉ះពាល់ធ្ងន់ធ្ងរដល់ឥទ្ធិពលយុទ្ធសាស្ត្រខ្លួនក្នុងតំបន់ បន្ទាប់ពីការដួលរលំនៃសម្ព័ន្ធមិត្តរុស្ស៊ីគឺអតីតប្រធានាធិបតី Bashar al-Assad ដោយក្រុមឧទ្ទាម ក្នុងខែធ្នូ ហើយលោក Ahmed al-Sharaa បានជំនួសតំណែងជាប្រធានាធិបតីស៊ីរីថ្មី។

ព្រះចៅកាតាអង្គនោះបានមានបន្ទូលប្រាប់លោក Putin ក្នុងកិច្ចប្រជុំថា "កាតា បានពិភាក្សាជាមួយមេដឹកនាំស៊ីរីថ្មីអំពីទំនាក់ទំនងជាប្រវត្តិសាស្ត្រ និងយុទ្ធសាស្ត្ររវាងស៊ីរី និងរុស្ស៊ី ហើយពេលនេះ ស៊ីរីចង់កសាងទំនាក់ទំនងរវាងប្រទេសទាំងពីរដោយផ្អែកលើការគោរពគ្នាទៅវិញទៅមក"។

លោក Putin បាននិយាយថា ការវិវឌ្ឍនៃស្ថានការណ៍នៅស៊ីរី ដែលត្រូវបានរង្គោះរង្គើដោយអំពើហិង្សានិកាយក្នុងប៉ុន្មានសប្តាហ៍ថ្មីៗនេះ គឺមានសារៈសំខាន់យ៉ាងខ្លាំង។ ជាមួយគ្នានេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា រុស្ស៊ីកំពុងពិភាក្សាជាមួយប្រទេសសំខាន់ៗក្នុងតំបន់ទាំងអស់នៅមជ្ឈិមបូព៌ា អំពីទំនាក់ទំនងរបស់ខ្លួនជាមួយស៊ីរី៕