នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បាននិយាយនៅថ្ងៃសុក្រ (១៨ មេសា) នេះថា របបសឹកមីយ៉ាន់ម៉ា និងក្រុមប្រឆាំងដ៏សំខាន់មួយ បានបង្ហាញថា ពួកគេនឹងបន្តបទឈប់បាញ់ដើម្បីគាំទ្រដល់កិច្ចខិតខំប្រឹងប្រែងជំនួយបន្ថែមទៀតបន្ទាប់ពីការរញ្ជួយដីដ៏ខ្លាំងក្លានៅក្នុងប្រទេសដែលហែកហួរដោយជម្លោះមួយនេះ។

ក្រៅពីជំនួបជាមួយលោកឧត្តមសេនីយ Min Aung Hlaing នៅទីក្រុងបាងកក កាលពីថ្ងៃទី១៧ ខែមេសា លោក Anwar បាននិយាយថា លោកក៏បានពិភាក្សានៅថ្ងៃសុក្រនេះ ជាមួយនឹងក្រុមប្រឆាំង គឺរដ្ឋបាលស្រមោលរបស់មីយ៉ាន់ម៉ា NUG ជាផ្នែកមួយនៃកិច្ចខិតខំប្រឹងប្រែងក្នុងតំបន់ ដើម្បីចូលរួមភាគីទាំងអស់នៅក្នុងជម្លោះ។

លោក Anwar បានប្រាប់អ្នកយកព័ត៌មានក្នុងរដ្ឋធានីថៃថា "នឹងមានបទឈប់បាញ់ និងគ្មានការបង្កហេតុដែលមិនចាំបាច់ទេ ព្រោះបើមិនដូច្នេះទេ ប្រតិបត្តិការមនុស្សធម៌ទាំងមូលនឹងបរាជ័យ"។ លោកបន្ថែមថា កិច្ចពិភាក្សាដំបូងរបស់លោកជាមួយប្រមុខរបបសឹក និងក្រុមប្រឆាំងមីយ៉ាន់ម៉ា បានជោគជ័យណាស់។

គួរឱ្យដឹងថា របបសឹកមីយ៉ាន់ម៉ា បានប្រកាសបទឈប់បាញ់ ២០ថ្ងៃកាលពីថ្ងៃទី០២ ខែមេសា បន្ទាប់ពីមានសកម្មភាពស្រដៀងគ្នានេះដោយក្រុមប្រឆាំង NUG ក្រោយរញ្ជួយដីដ៏ធំកាលពីថ្ងៃទី២៨ ខែមីនា ដែលបានសម្លាប់មនុស្សជាង ៣.៦០០នាក់។ ទោះជាយ៉ាងនេះក្ដី របបសឹកនៅតែបន្តប្រតិបត្តិការយោធាក្នុងតំបន់មួយចំនួន នេះបើយោងតាមអង្គការសហប្រជាជាតិ និងក្រុមផ្សេងទៀតនៅមីយ៉ាន់ម៉ា៕