ប្រធានាធិបតីអាមេរិក លោក Donald Trump បាននិយាយនៅថ្ងៃព្រហស្បតិ៍ (១៧ មេសា) ថា លោកមិនប្រញាប់ប្រញាល់វាយប្រហារលើអ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួននោះទេ មួយថ្ងៃមុនកិច្ចចរចាជុំទីពីររវាងសហរដ្ឋអាមេរិក និងអ៊ីរ៉ង់ នៅក្នុងទីក្រុងរ៉ូម របស់អ៊ីតាលី។

នៅពេលត្រូវសាកសួរពីរបាយការណ៍របស់កាសែត New York Times ដែលនិយាយថាលោកជំទាស់ការវាយប្រហាររបស់អ៊ីស្រាអែលលើអ៊ីរ៉ង់ លោក Trump បានឆ្លើយថា "លោកមិនបាននិយាយថាជំទាស់ទេ ប៉ុន្តែលោកក៏មិនប្រញាប់ធ្វើរឿងនេះដែរ ព្រោះអ៊ីរ៉ង់ មានឱកាសក្លាយជាប្រទេសដ៏អស្ចារ្យមួយ"។

គួរឱ្យដឹងថា កាសែត New York Times បានរាយការណ៍នៅថ្ងៃពុធថា លោក Trump បានរារាំងផែនការវាយប្រហាររបស់អ៊ីស្រាអែល ដែលបានគ្រោងទុកក្នុងខែឧសភា លើទីតាំងនុយក្លេអ៊ែរអ៊ីរ៉ង់ ដើម្បីគាំទ្រការចរចាកិច្ចព្រមព្រៀងជាមួយទីក្រុងតេអេរ៉ង់ ក្នុងការដាក់ដែនកំណត់កម្មវិធីនុយក្លេអ៊ែររបស់ខ្លួន។

លោក Trump បានគំរាមវាយប្រហារអ៊ីរ៉ង់ ម្តងហើយម្តងទៀត និងបន្តដំឡើងពន្ធដល់ប្រទេសទីបី ដែលទិញប្រេងពីអ៊ីរ៉ង់ ប្រសិនបើទីក្រុងតេអេរ៉ង់ មិនចុះកិច្ចព្រមព្រៀងជាមួយទីក្រុងវ៉ាស៊ីនតោន ជុំវិញកម្មវិធីនុយក្លេអ៊ែរ ដែលមានជម្លោះរបស់ខ្លួនទេនោះ ខណៈអាមេរិកក៏បានបញ្ជូនយន្តហោះចម្បាំងបន្ថែមទៅក្នុងតំបន់នេះរួចហើយផងដែរ៕