បណ្ដាញឯកសារពីក្រសួងការបរទេសផ្ទៃក្នុងអាមេរិក មើលឃើញដោយសារព័ត៌មាន បានបង្ហាញថា រដ្ឋបាលរបស់លោកប្រធានាធិបតីអាមេរិក Donald Trump កាលពីថ្ងៃព្រហស្បតិ៍ (១៧ មេសា) បានបញ្ជាឱ្យត្រួតពិនិត្យប្រព័ន្ធផ្សព្វផ្សាយសង្គមរបស់អ្នកដាក់ពាក្យសុំទិដ្ឋាការសហរដ្ឋអាមេរិកទាំងអស់ ដែលធ្លាប់បានទៅតំបន់ហ្កាហ្សាស្ទ្រីប នៅក្នុងអំឡុង ឬក្រោយថ្ងៃទី០១ ខែមករា ឆ្នាំ២០០៧ នៅក្នុងការជំរុញចុងក្រោយបំផុតដើម្បីរឹតបន្តឹងការត្រួតពិនិត្យអ្នកធ្វើដំណើរបរទេស។

បណ្ដាញនោះនិយាយថា បទបញ្ជាត្រួតពិនិត្យប្រព័ន្ធផ្សព្វផ្សាយសង្គមសម្រាប់ទិដ្ឋាការជនអន្តោប្រវេសន៍ និងមិនមែនអន្តោប្រវេសន៍ទាំងអស់នេះ រួមបញ្ចូលបុគ្គលិកអង្គការមិនមែនរដ្ឋាភិបាល NGO ក៏ដូចជាបុគ្គលដែលបានស្ថិតនៅក្នុងតំបន់ហ៊ុមព័ទ្ធប៉ាឡេស្ទីននោះ សម្រាប់រយៈពេលណាមួយនៅក្នុងសមត្ថភាពផ្លូវការ ឬការទូត។

បណ្ដាញបន្តថា "ប្រសិនបើការពិនិត្យឡើងវិញនៃលទ្ធផលប្រព័ន្ធផ្សព្វផ្សាយសង្គម រកឃើញព័ត៌មានសង្ស័យទាក់ទងនឹងបញ្ហាសន្តិសុខ នោះភ្នាក់ងារត្រូវតែដាក់លិខិតជូនដំណឹង" ដោយសំដៅលើមតិយោបល់ផ្នែកសន្តិសុខ ដែលជាការស៊ើបអង្កេតអន្តរកម្មដើម្បីកំណត់ថា តើអ្នកដាក់ពាក្យសុំទិដ្ឋាការ បង្កហានិភ័យសន្តិសុខជាតិដល់អាមេរិកដែរឬទេ។

ជំហាននេះកើតឡើងនៅពេលរដ្ឋបាលលោក Trump បានដកហូតទិដ្ឋាការរាប់រយនៅទូទាំងប្រទេស រួមទាំងស្ថានភាពស្របច្បាប់នៃអ្នករស់នៅអចិន្ត្រៃយ៍មួយចំនួន នៅក្រោមច្បាប់ឆ្នាំ១៩៥២ ដែលអនុញ្ញាតឱ្យមានការនិរទេសជនអន្តោប្រវេសន៍ណាម្នាក់ ដែលត្រូវចាត់ទុកថា មានគ្រោះថ្នាក់ដល់គោលនយោបាយការបរទេសរបស់អាមេរិក៕