រដ្ឋមន្ត្រីការបរទេសអាមេរិក លោក Marco Rubio នៅថ្ងៃសុក្រ (ទី១៨ ខែមេសា) នេះ បាននិយាយថា ប្រធានាធិបតីអាមេរិក លោក Donald Trump នឹងមិនព្យាយាមធ្វើជាអ្នកសម្របសម្រួល ដើម្បីឲ្យមានកិច្ចព្រមព្រៀងសន្តិភាពរុស្ស៊ី-អ៊ុយក្រែន ក្នុងរង្វង់ប៉ុន្មានថ្ងៃខាងមុខ ប្រសិនបើមិនមានសញ្ញាច្បាស់លាស់ ដែលថា កិច្ចព្រមព្រៀងមួយអាចកើតឡើងបាន។

នៅឯទីក្រុងប៉ារីស ប្រទេសបារាំង បន្ទាប់ពីបានជួបជាមួយបណ្ដាមេដឹកនាំអឺរ៉ុប និងអ៊ុយក្រែន លោក Rubio បាននិយាយថា៖ «យើងនឹងមិនបន្តការប្រឹងប្រែងនេះ ក្នុងរយៈពេលជាច្រើនសប្តាហ៍ និងជាច្រើនខែ ដោយគ្មានទីបញ្ចប់នោះទេ។ ដូច្នេះ យើងត្រូវកំណត់ឲ្យបានឆាប់បំផុត នាពេលឥឡូវនេះ ហើយខ្ញុំកំពុងនិយាយអំពីបញ្ហានៃរយៈពេលថា តើកិច្ចការនេះអាចសម្រេចបានដែរ ឬអត់ នៅក្នុងប៉ុន្មានសប្តាហ៍ខាងមុខនេះ»។

លោករដ្ឋមន្ត្រីរូបនេះ បានសង្កត់ធ្ងន់ថា៖ «លោកប្រធានាធិបតីមានខ្វល់ខ្វាយយ៉ាងខ្លាំង ចំពោះរឿងនេះ។ លោកបានលះបង់ទាំងពេលវេលា និងថាមពលជាច្រើន ចំពោះរឿងនេះ។ ការងារនេះគឺសំខាន់ ប៉ុន្តែមានរឿងសំខាន់កើតឡើងជាច្រើនផ្សេងទៀតដែលសមនឹងទទួលការយកចិត្តទុកដាក់ខ្លាំងដូចគ្នាដែរ ឬគួរតែត្រូវបានផ្ដោតឲ្យបានខ្លាំងទៀតផង»។

គួរបញ្ជាក់ថា ការព្រមានរបស់លោក Rubio កើតឡើងចំពេលមានសញ្ញានៃវឌ្ឍនភាពមួយចំនួន ក្នុងដំណើរការចរចារបស់អាមេរិកជាមួយអ៊ុយក្រែន។ លោក Trump បាននិយាយកាលពីថ្ងៃទី១៧ ខែមេសាថា លោករំពឹងថា នឹងចុះហត្ថលេខាលើកិច្ចព្រមព្រៀងជាមួយទីក្រុងគីវ នាសប្តាហ៍ក្រោយ ជាកិច្ចសន្យាដែលនឹងផ្តល់ឲ្យសហរដ្ឋអាមេរិកនូវលទ្ធភាពទទួលបានរ៉ែរបស់អ៊ុយក្រែន។ ការប៉ុនប៉ងចុះហត្ថលេខាលើកិច្ចព្រមព្រៀងរ៉ែ ក្នុងខែកុម្ភៈ បានដួលរលំបន្ទាប់ពីមានការប៉ះទង្គិចគ្នា រវាងប្រធានាធិបតីអ៊ុយក្រែន លោក Volodymyr Zelensky ជាមួយលោក Trump និងអនុប្រធានាធិបតី J.D. Vance នៅក្នុងការិយាល័យ Oval Office៕