ភ្នំពេញ ៖ តំណាងកម្ពុជាប្រចាំនៅអង្គការសហប្រជាជាតិ បានច្រានចោលនូវការលើកឡើងរបស់អ្នកនាំពាក្យការិយាល័យឧត្ដមស្នងការសិទ្ធិមនុស្សអង្គការសហប្រជាជាតិទទួលបន្ទុកសិទ្ធិមនុស្ស (OHCHR)ទាក់ទិននឹងការស៊ើបអង្កេតលើជនសង្ស័យមួយចំនួនពាក់ព័ន្ធនឹងឧក្រិដ្ឋកម្ម។
លោក Rubert Colville អ្នកនាំពាក្យនៃការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស(OHCHR)កាលពីថ្ងៃសុក្រសប្ដាហ៍មុន បានអំពាវនាវឱ្យមានការស៊ើបអង្កេតពេញលេញ និងឯករាជ្យទៅលើការស្លាប់លោក ស៊ិន ខុន ដែលជាសកម្មជនរបស់អតីតគណបក្សប្រឆាំង។
លោក ស៊ិន ខុន ត្រូវបានគេសម្លាប់កាលពីថ្ងៃទី២១ ខែវិច្ឆិកាកន្លងមកនៅជិតផ្ទះរបស់គាត់នៅរាជធានីភ្នំពេញ ហើយបន្ទាប់មកសមត្ថកិច្ចកម្ពុជា បានចាប់ខ្លួនបុរសម្នាក់ ដែលបានសារភាពថា ជាអ្នកបានសម្លាប់លោក ស៊ិន ខុន។
ប៉ុន្តែ មន្ត្រីនាំពាក្យOHCHRលើកឡើងថាជនសង្ស័យម្នាក់ដែលត្រូវបានសមត្ថកិច្ចកម្ពុជាចាប់ខ្លួនបាននោះ មិនស៊ីសង្វាក់គ្នាទៅនឹងព័ត៌មានដែលអង្គការមួយនេះទទួលបាននោះឡើយ។
ជាការឆ្លើយតប ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវ បានលើកឡើងថា អាជ្ញាធរកម្ពុជាបានធ្វើការស៊ើបអង្កេតដោយហ្មត់ចត់ដោយមានការផ្ទៀងផ្ទាត់ជាមួយភស្តុតាង និងសាក្សី រហូតឈានទៅចាប់ខ្លួនជនសង្ស័យបាន។
តំណាងកម្ពុជា បានបញ្ជាក់ទៅOHCHR ឱ្យដាក់ភស្តុតាងទៅអាជ្ញាធរកម្ពុជា ដើម្បីផ្ទៀងផ្ទាត់ ប្រសិនបើអង្គការមួយនេះមានភស្តុតាងដាក់បន្ទុករឹងមាំនោះ។
មន្ត្រីនាំពាក្យអង្គការOHCHRបានលើកឡើងថា លោក ស៊ិន ខុន គឺជាសកម្មជនបក្សអតីតបក្សប្រឆាំងដែលត្រូវបានរំលាយកាលពីឆ្នាំ២០១៧កន្លងមក។
ប៉ុន្តែ តំណាងកម្ពុជាបញ្ជាក់ថា ការភ្ជាប់សវតាបែបនេះ មិនត្រឹមត្រូវនោះឡើយ ហើយបង្ហាញឱ្យឃើញពីការប៉ុនប៉ងធ្វើនយោបាយលើករណីនេះទៅវិញ។
ក្រៅពីករណីឃាតកម្ម លោក ស៊ិន ខុន អ្នកនាំពាក្យអង្គការ OHCHRបានលើកឡើងពីការចាប់ខ្លួនអ្នកគាំទ្រអតីតបក្សប្រឆាំងដែលបានជ្រកកោននៅក្នុងប្រទេសថៃ បញ្ជូនត្រឡប់មកទទួលទោសនៅកម្ពុជាវិញ។
ទាក់ទងនឹងករណីនេះ តំណាងកម្ពុជាបញ្ជាក់ទៀតថា ការចូលរួមនយោបាយជាមួយបក្សនយោបាយមួយ មិនមែនជាអាជ្ញាប័ណ្ណសម្រាប់ប្រព្រឹត្តល្មើសច្បាប់នោះឡើយ និងគ្មានទោសទណ្ឌនោះឡើយ។
តំណាងកម្ពុជា បានជំរុញទៅអង្គការOHCHRឱ្យផ្ដោតទៅលើបញ្ហាប្រឈមសិទ្ធិមនុស្សដែលមាននិន្នាការគួរឱ្យព្រួយបារម្ភ ដូចជា ការប្រើប្រាស់ភាសាសម្អប់ ការនិយាយបង្ខាច់បង្ខូច ការផ្សព្វផ្សាយព័ត៌មានមិនពិត និងការញុះញង់ ដែលត្រូវបានប្រព្រឹត្តឡើងនៅក្រោមស្លាកគណបក្សនយោបាយ៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
