វីដេអូដែលចេញផ្សាយដោយទីបញ្ជាការកណ្តាលរបស់សហរដ្ឋអាមេរិក កាលពីថ្ងៃសុក្រ (ទី១៨ ខែមេសា) បានបង្ហាញពីអ្វីដែលពួកគេនិយាយថា ជាប្រតិបត្តិការរបស់ខ្លួន ប្រឆាំងនឹងក្រុមសកម្មប្រយុទ្ធហ៊ួទី។

វីដេអូឃ្លីបទាំង ៤ ត្រូវបានបង្ហោះ នៅលើបណ្តាលសង្គម X រួមជាមួយនឹងចំណងជើងថា «ប្រតិបត្តិការ ២៤ម៉ោង ក្នុង១ថ្ងៃ និង ៧ថ្ងៃ ក្នុង១មួយសប្តាហ៍ សម្រាប់នាវា USS Harry S. Truman (CVN 75) និងនាវា USS Carl Vinson (CVN 70)) ប្រឆាំងនឹងក្រុមហ៊ួទី ដែលគាំទ្រដោយអ៊ីរ៉ង់...ក្រុមហ៊ួទី គឺជាក្រុមភេរវករ។

សារព័ត៌មានរ៉យទ័រ មិនអាចផ្ទៀងផ្ទាត់ទីតាំង និងកាលបរិច្ឆេទនៃវីដេអូនេះ ដោយឯករាជ្យបានទេ។

ការចេញផ្សាយវីដេអូនេះ ធ្វើឡើង បន្ទាប់ពីមានរបាយការណ៍របស់ក្រសួងសុខាភិបាលដែលគ្រប់គ្រងដោយក្រុមហ៊ួទីថា ការវាយប្រហាររបស់សហរដ្ឋអាមេរិកទៅលើស្ថានីយប្រេងឥន្ធនៈ Ras Isa របស់ប្រទេសយេម៉ែន នៅលើឆ្នេរសមុទ្រ Red Sea បានសម្លាប់មនុស្សយ៉ាងហោចណាស់ ៧៤នាក់។ ការវាយប្រហារនេះ នឹងក្លាយជាការវាយប្រហារដ៏សាហាវបំផុត ចាប់តាំងពីសហរដ្ឋអាមេរិក បានចាប់ផ្តើមយុទ្ធនាការវាយប្រហារប្រឆាំងនឹងក្រុមហ៊ួទី កាលពីឆ្នាំមុន។

ប្រធានាធិបតីសហរដ្ឋអាមេរិកលោក ដូណាល់ ត្រាំ បានបញ្ជាឲ្យបង្កើនការវាយប្រហារកាលពីខែមុន នៅក្នុងប្រតិបត្តិការយោធាដ៏ធំបំផុតរបស់សហរដ្ឋអាមេរិក នៅមជ្ឈិមបូព៌ា ចាប់តាំងពីលោកបានចូលកាន់តំណែង ក្នុងខែមករា។ ទីក្រុងវ៉ាស៊ីនតោន បានប្តេជ្ញាបន្តវាយប្រហារទៅលើក្រុមហ៊ួទី ដែលមានសម្ព័ន្ធមិត្តអ៊ីរ៉ង់ រហូតដល់ក្រុមនេះ បញ្ឈប់ការវាយប្រហារលើនាវា នៅសមុទ្រក្រហម។