កាលពីថ្ងៃសៅរ៍ម្សិលមិញ ក្រុមបាតុករបានប៉ះទង្គិចគ្នាជាមួយនគរបាលនៅតំបន់សហគមន៍ Mazor ជាទីដែលគេរំពឹងថា នាយករដ្ឋមន្រ្តីអ៊ីស្រាអែលលោក Benjamin Netanyahu បំពេញទស្សនកិច្ចទៅកាន់ទីនោះ ។

 ក្រុមបាតុករបង្ហាញការខឹងសម្បាររបស់ពួកគេចំពោះពាក្យសន្យារបស់លោក Netanyahu ថានឹងបន្តសង្រ្គាមជាមួយក្រុមហាម៉ាស ដោយពួកគេទាមទារឲ្យបញ្ចប់សង្រ្គាម និងដោះលែងចំណាប់ថ្នូរសេសសល់ ៥៩នាក់នៅតំបន់ហ្កាហ្សា ។

 ភាពតានតឹងបានកើតមានឡើង ពេលដែលក្រុមបាតុកររុញរបាំងនគរបាល ។ ពួកគេនាំគ្នាកាន់បដា និងស្រែកពាក្យស្លោក ចោទប្រកាន់លោក Netanyahu ថាបានអូសបន្លាយពេលធ្វើសង្រ្គាមដែលពួកគេជឿថា ពុំសម្រេចបានអ្វីនោះទេ ក្រៅពីការបំផ្លិចបំផ្លាញមួយប៉ុណ្ណោះ ។

 ទោះបីជាយ៉ាងណាក៏ដោយ លោក Netanyahu បាននិយាយការពារការសម្រេចិត្តរបស់លោកក្នុងការបន្តប្រតិបត្តិការសឹកនៅតំបន់ហ្កាហ្សា ដោយលោកបញ្ជាក់ថា ក្រុមហាម៉ាស បានច្រានចោលបទឈប់បាញ់ស្នើសុំបណ្តោះអាសន្នកាលពីដើមសប្តាហ៍នេះ ។

 លោក Netanyahu និយាយនៅក្នុងសេចក្តីថ្លែងការណ៍ថតទុកមុនថា លោកនឹងមិនចុះចាញ់ក្រុមហាម៉ាសជាដាច់ខាត ។ សមិទ្ធិផលទាំងអស់ដែលពួកយើងបង្កើតឡើង នឹងត្រូវរលាយសាបសូន្យទាំងអស់ បើសិនជាពួកយើងចុះចាញ់សង្រ្គាមមួយនេះ ៕