ក្រសួងសុខាភិបាលរបស់ក្រុមឧទ្ទាមហ៊ួទី(Houthi)បាននិយាយនៅព្រឹកថ្ងៃចន្ទនេះថា ការវាយប្រហារតាមអាកាសថ្មីរបស់សហរដ្ឋអាមេរិកទៅលើរដ្ឋធានីសាណា (Sanaa) ប្រទេសយេម៉ែនបានសម្លាប់មនុស្សយ៉ាងហោចណាស់ ១២ នាក់ និងរបួស ៣០ នាក់ ។ 

ទីភ្នាក់ងារសារព័ត៌មាន Saba គ្រប់គ្រងដោយក្រុមហ៊ួទី បានដកស្រង់សម្ដីពីក្រសួងខាងលើដោយនិយាយថា អ្នកស្លាប់ និងរបួសបណ្ដាលមកពីការវាយប្រហារទាំងយប់ "ដោយសត្រូវអាមេរិក" នៅលើ ផ្សារមួយកន្លែង និងតំបន់លំនៅដ្ឋានមួយនៅក្នុងស្រុក Farwa របស់រដ្ឋធានី សាណា។

សារព័ត៌មាន Saba បាននិយាយថា ការវាយឆ្មក់ផ្សេងទៀតត្រូវបានគេរាយការណ៍កាលពីល្ងាចថ្ងៃអាទិត្យនៅក្នុងខេត្តភាគកណ្តាល Marib ទីក្រុង Hodeida នៅភាគខាងលិច និងបន្ទាយក្រុមហ៊ួទី នៅ ភាគខាងជើងរដ្ឋធានីសាណា ។

យោធាអាមេរិកបាននិងកំពុងវាយប្រហារស្ទើរតែរាល់ថ្ងៃកាលពីខែមុន ដោយនិយាយថា ខ្លួនកំពុងកំណត់គោលដៅ "ភេរវករហ៊ួទីគាំទ្រដោយអ៊ីរ៉ង់" ដើម្បីបញ្ឈប់ការវាយប្រហារលើការដឹកជញ្ជូនអន្តរជាតិនៅឈូងសមុទ្រ។

ការវាយប្រហារមួយកាលពីថ្ងៃព្រហស្បតិ៍សប្ដាហ៍មុនលើកំពង់ផែប្រេង Ras Issa បានសម្លាប់មនុស្សប្រហែល ៨០នាក់ និងរបួស ១៥០នាក់ នេះបើតាមក្រុមហ៊ួទី។

អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃសៅរ៍ថា លោកមានការព្រួយបារម្ភយ៉ាងខ្លាំងចំពោះការវាយប្រហាររបស់សហរដ្ឋអាមេរិក។

ប៉ុន្តែលោកក៏បានអំពាវនាវឲ្យក្រុមហ៊ួទីបញ្ឈប់ការវាយប្រហារដោយមីស៊ីលលើអ៊ីស្រាអែល និងការដឹកជញ្ជូននៅឈូងសមុទ្រផងដែរ។ក្រុមហ៊ួទីបាននិយាយថា ពួកគេបានចាប់ផ្តើមការវាយប្រហារដោយមីស៊ីលជាការបង្ហាញសាមគ្គីភាពជាមួយប៉ាឡេស្ទីនស្របពេលមានសង្គ្រាមរបស់អ៊ីស្រាអែលនៅតំបន់ហ្កាហ្សាចាប់តាំងពីថ្ងៃទី ៧ ខែតុលាឆ្នាំ ២០២៣៕