វិមានក្រឹមឡាំង នៅថ្ងៃចន្ទ (ទី២១ ខែមេសា) នេះ បានលើកឡើងថា ជំហររបស់រដ្ឋបាលប្រធានាធិបតីអាមេរិក លោក Donald Trump ក្នុងការច្រានចោលសមាជិកភាពអង្គការណាតូ (NATO) សម្រាប់អ៊ុយក្រែន បានធ្វើឲ្យទីក្រុងមូស្គូពេញចិត្ត ប៉ុន្តែបានបដិសេធមិនធ្វើអត្ថាធិប្បាយអ្វីឡើយ ជុំវិញក្តីសង្ឃឹមរបស់មេដឹកនាំ សម្រាប់កិច្ចព្រមព្រៀង ក្នុងសប្តាហ៍នេះ។

បេសកជនសហរដ្ឋអាមេរិក លោកឧត្តមសេនីយ៍ Keith Kellogg បាននិយាយកាលពីថ្ងៃអាទិត្យថា សមាជិកភាពរបស់អង្គការណាតូ គឺ «គ្មាននៅក្នុងការពិភាក្សាទៀតទេ» សម្រាប់អ៊ុយក្រែន។ លោក Trump បាននិយាយម្តងហើយម្តងទៀតថា ការគាំទ្រពីមុនរបស់សហរដ្ឋអាមេរិក ចំពោះការប៉ុនប៉ងរបស់អ៊ុយក្រែន ដើម្បីចូលរួមជាមួយអង្គការណាតូ គឺជាដើមហេតុនាំឲ្យមានសង្គ្រាម។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងបានឮពីទីក្រុងវ៉ាស៊ីនតោន នៅកម្រិតផ្សេងៗគ្នាថា សមាជិកភាពរបស់អ៊ុយក្រែន នៅក្នុងអង្គការណាតូ ត្រូវបានដកចេញហើយ»។

លោក Peskov បាននិយាយថា សមាជិកភាពអ៊ុយក្រែននៃសម្ព័ន្ធភាពយោធាដឹកនាំដោយសហរដ្ឋអាមេរិកនេះ នឹង «គំរាមកំហែងដល់ផលប្រយោជន៍ជាតិរបស់សហព័ន្ធរុស្ស៊ី។ ហើយជាការពិត នេះគឺជាមូលហេតុមួយក្នុងចំណោមមូលហេតុផ្សេងទៀត ដែលនាំឲ្យមានជម្លោះ»។

លោក Vladimir Putin បានលើកឡើងម្តងហើយម្តងទៀតថា រុស្ស៊ីនឹងមានឆន្ទៈក្នុងការបញ្ចប់សង្រ្គាម ប្រសិនបើអ៊ុយក្រែនទម្លាក់ជាផ្លូវការនូវមហិច្ឆិតាចូលរួមជាមួយអង្គការណាតូ ហើយដកកងទ័ពរបស់ខ្លួនចេញពីដែនដីទាំងមូលនៃតំបន់ចំនួនបួន ដែលអ៊ុយក្រែនទាមទារ និងដែលភាគច្រើនគ្រប់គ្រងដោយរុស្ស៊ី៕