ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ (២១ មេសា) ថា សេដ្ឋកិច្ចអាមេរិកអាចនឹងធ្លាក់ចុះ ប្រសិនបើអត្រាការប្រាក់មិនត្រូវបានបញ្ចុះភ្លាមៗទេនោះ ដោយលើកការរិះគន់របស់លោកម្តងហើយម្តងទៀតលើប្រធានធនាគារកណ្តាល លោក Jerome Powell ដែលនិយាយថា អត្រាការប្រាក់មិនគួរត្រូវបានបន្ទាបទេ រហូតដល់ខ្លួនកាន់តែច្បាស់ថា ផែនការពន្ធរបស់លោក Trump នឹងមិននាំទៅរកកំណើនអតិផរណាជាប់លាប់។

លោក Trump បាននិយាយនៅក្នុងការបង្ហោះនៅលើបណ្ដាញសង្គមថា "ជាមួយនឹងការចំណាយមាននិន្នាការធ្លាក់ចុះខ្លាំង នោះស្ទើរតែមិនមានអតិផរណាទេ ប៉ុន្តែអាចមានការយឺតយ៉ាវនៃសេដ្ឋកិច្ច លុះត្រាតែប្រមុខធនាគារកណ្ដាល បន្ថយអត្រាការប្រាក់ឥឡូវនេះ"។

កំណើនសម្ពាធពីរដ្ឋបាលអាមេរិកលើលោក Powell និងបំណងរបស់លោក Trump ដែលចង់ឱ្យប្រធានធនាគារកណ្ដាលរូបនេះចុះពីតំណែង បានធ្វើឱ្យទីផ្សារភាគហ៊ុនធ្លាក់ចុះ និងការសម្រុកលក់បណ្ណបំណុលកាន់តែខ្ពស់ ខណៈវិនិយោគិន និងក្រុមអ្នកវិភាគភ័យខ្លាចភាពរង្គោះរង្គើ ប្រសិនបើលោក Trump បញ្ឆេះជម្លោះ ជុំវិញឯករាជ្យភាពនៃគោលនយោបាយរូបិយវត្ថុរបស់ធនាគារកណ្ដាល ហើយព្យាយាមដកលោក Powell មុនពេលចុងបញ្ចប់នៃអាណត្តិរបស់លោកក្នុងពេលជាង ១ឆ្នាំខាងមុខ។

គេមិនច្បាស់ទេថាលោក Trump មានសិទ្ធិអំណាចដកតំណែងលោក Powell បានឬយ៉ាងណា ហើយបើទោះបីជាជោគជ័យក៏ដោយ ក៏រចនាសម្ព័ន្ធអភិបាលកិច្ចរបស់ធនាគារកណ្ដាល នឹងត្រូវផ្តល់ឱ្យសមាជិកក្រុមប្រឹក្សាភិបាលសេសសល់ និងប្រធានធនាគារក្នុងតំបន់ ជាអ្នកសម្រេចចិត្តលើអត្រាការប្រាក់ ដោយនេះអាចបង្ខំឱ្យសេតវិមានលូកដៃចូលកាន់តែជ្រៅលើកិច្ចការក្រុមប្រឹក្សាភិបាលធនាគារកណ្ដាលឯករាជ្យនោះ៕