នៅព្រឹកថ្ងៃទី២២ ខែមេសា ឆ្នាំ២០២៥នេះ គណៈប្រតិភូមកពីក្រសួងសេដ្ឋកិច្ច និងហិរញ្ញ​វត្ថុ​កម្ពុជា និងគណៈប្រតិភូស្ថានទូតអង់គ្លេសប្រចាំនៅកម្ពុជា អញ្ជើញទស្សនា និងពិនិត្យ​វឌ្ឍនភាព​ព្រលាន​យន្តហោះអ​ន្តរជាតិតេជោ ដែលគ្រោងនឹង​សម្ពោធដាក់ឲ្យដំណើរការ​នាខែកក្កដាខាង មុខ​នេះ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

នៅក្នុងដំណើរទស្សនកិច្ចនេះ គណៈប្រតិភូបានបង្ហាញទឹកមុខសប្បាយរីករាយ និងយល់ឃើញថា ព្រលាន​ថ្មី​នេះមានលក្ខណៈទំនើប និងថ្មី ដែលបង្ហាញអំពីភាពអស្ចារ្យរបស់កម្ពុជា និងខណៈដែល​ប្រទេស​កម្ពុជា គឺមានសក្តានុពលជាច្រើនផ្សេងទៀត។

តាមការលើកឡើងរបស់ លោកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបញ្ជាក់ឲ្យដឹងថា គិតមកដល់ពេលនេះ អាកាស​យាន​ដ្ឋាន​អន្តរ​ជាតិ​តេជោ ក្រុងតាខ្មៅ សម្រេចការសាងសង់ប្រមាណជាង ៩៥% និងគ្រោងដាក់​ឱ្យ​ដំណើរ​នា​ខែ​កក្កដា​ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយក​រដ្ឋ​មន្រ្តី​នៃ​កម្ពុជា។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជា​ព្រលាន​យន្ត​ហោះលំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១។

សូមបញ្ជាក់ថា គិតរហូតមកដល់ពេលនេះ មន្រ្តីជាន់​ខ្ពស់​មក​ពី​បណ្តា​ទូត​ប្រចាំ​ប្រទេស​កម្ពុជា​ជា​ច្រើ​ន​រូប គណៈប្រតិភូមកពីស្ថាប័នរដ្ឋ និងឯកជន រួមទាំង​ក្រុម​អ្នក​សារ​ព័ត៌មានជាតិ និងអ​ន្តរ​ជាតិ​ជា​ច្រើន បានអញ្ជើញមកទស្សនា និងស្វែងយល់ពីអាកាសយានដ្ឋានអន្តរជាតិតេជោ ហើយ​ក្រោយ​ពី​ទស្សនកិច្ចទាំងនោះ មន្រ្តីទូត និងអ្នកសារព័ត៌មានជាច្រើននាក់បានវាយតម្លៃ និង​យល់​ឃើញ​ថា អាកាសយានដ្ឋាននេះល្អទាំងអស់ និងបានបង្ហាញមិននឹកស្មានថា ប្រទេស​កម្ពុជា​មាន​ការ​វិនិយោគលើព្រលានយន្តហោះថ្មីនេះរហូតដល់ខ្នាត 4F ៕ អត្ថបទ៖ ឈិត បូរ៉ាវី