នៅព្រឹកថ្ងៃទី២៣ ខែមេសា ឆ្នាំ២០២៥នេះ មានករណីផ្ទុះគ្រាប់មីនតោន​ក្នុងពេល​កំពុង​ភ្ជួរដីចម្ការ​នៅ​ចំនុចអូរថ្មក្នុងភូមិអូរជីក ឃុំផ្អាវ ស្រុកត្រពាំងប្រាសាទ ខេត្តឧត្តមានជ័យ បណ្តាល​ឱ្យ​អ្នក​បើកប​រត្រាក់ទ័រ រងរបួសជាទម្ងន់និងបានបញ្ជូនទៅមន្ទីរពេទ្យបង្អែកខេត្តឧត្តរមានជ័យ។ នេះបើតាមការឲ្យដឹងពីឯកឧត្តម ហេង រតនា ប្រតិភូរាជរដ្ឋាភិបាល​ទទួល​បន្ទុក​ជា​អគ្គនាយក​ស៊ីម៉ាក់ បានបង្ហោះលើបណ្តាញសង្គមហ្វេសបុកនៅមុននេះបន្តិច។

ឯកឧត្តមក៏បានរំលឹកផងដែរថា ថ្វីត្បិតសង្គ្រាមត្រូវបានបញ្ចប់ ប៉ុន្តែ​សំណល់​យុទ្ធ​ភណ្ឌ​សង្គ្រាម​នៅ​ក្នុង​ព្រះរា​ជា​ណាចក្រនេះ នៅតែបន្តបំផ្លិចបំផ្លាញសេចក្តីសុខសុវត្ថិភាពរបស់ប្រជាពលរដ្ឋខែ្មរ ហើយ​រាជរដ្ឋាភិបាលកំពុងតែបន្តខិតខំលុបបំបាត់សត្រូវជាឃាតករលាក់មុខទាំងនេះ៕