ព្រះវិហារ៖ រង្វង់មូលស្រអែម ដែលមានសំណង់លំនាំគោបុរៈទី៥ របស់ប្រាសាទព្រះវិហារ បានសម្ពោធដាក់ឲ្យប្រើប្រាស់ហើយ ដើម្បីជាកែសម្រួលស្ថានភាពចរាចរណ៍ និងលើកនូវសោភណ្ឌភាពតំបន់ប្រជុំជនស្រអែម មុននឹងឡើងទៅដល់ប្រាសាទព្រះវិហារ។
រង្វង់មូលស្រអែម ស្ថិតក្នុងឃុំស្រអែម ស្រុកជាំក្សាន្ត ខេត្តព្រះវិហារ បានសម្ពោធដាក់ឲ្យប្រើប្រាស់ជាផ្លូវការហើយនៅល្ងាចថ្ងៃទី០៦ ខែធ្នូ ឆ្នាំ២០២១ ក្រោមអធិបតីភាពដ៏ខ្ពង់ខ្ពស់ ឯកឧត្ដម មាស សុភា ទេស រដ្ឋមន្ដ្រីទទួលបន្ទុកបេសកកម្មពិសេស និងជាប្រធានក្រុមការងរាជរដ្ឋាភិបាលចុះមូលដ្ឋានខេត្តព្រះវិហារ និងថ្នាក់ដឹកនាំ មន្ដ្រីរាជការខេត្ត ជាមួយនឹងការចូលរួមរបស់ប្រជាពលរដ្ឋជាច្រើនកុះករផងដែរ។
ឯកឧត្ដម មាស សុភា មានប្រសាសន៍ថា រង្វង់មូលស្រអែម កើតឡើងពីការចូលរួមពីសប្បុរសជននានា ក៏ដូចជាថ្នាក់ដឹកនាំ កម្លាំងមានសមត្ថកិច្ច ដោយបានចូលរួមជាថវិកា រហូតស្ថាបនារង្វង់មូលស្រអែមនេះ បានជោគជ័យ និងបានដាក់សម្ពោធដាក់ឲ្យប្រើប្រាស់នាពេលនេះ។
ឯកឧត្ដម មាស សុភា បញ្ជាក់ថា ទីតាំងនេះពីមុនគឺមានលក្ខណៈស្មុគស្មាញពិបាកក្នុងការធ្វើដំណើរ ប៉ុន្តែក្រោយពីស្ថាបនារង្វល់មូលស្រអែមនេះរួច ទីតាំងនេះមានសណ្ដាប់ធ្នាប់ល្អប្រសើរ ដែលជាទីទាក់ទាញភ្ញៀវជាតិ និងអន្តរជាតិ មកលេងកំសាន្តនៅស្រុកជាំក្សាន្តនេះផងដែរ ។
ឯកឧត្ដម មាស សុភា ក៏បានបញ្ជាក់ថា ការសាងសង់រង្វង់មូលស្រអែមនេះត្រូវឆ្លងកាត់នីតិវិធីជាច្រើន ដូចជាការស្នើសុំទៅក្រសួងវប្បធម៌ ស្នើសុំទៅអាជ្ញាធរជាតិព្រះវិហារ និងឆ្លងកាត់ការរចនាប្លង់ដ៏ពិបាកផងដែរ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឲ្យដឹងថា សំណង់ដ៏គួរជាទីស្ញប់ស្ញែងនេះ គឺមានការផ្តួចផ្តើមកសាងឡើងដោយថ្នាក់ដឹកនាំខេត្ត និងសប្បុរសជន ដោយមិនបានប្រើប្រាស់ថវិកាជាតិនោះឡើយ។
លោក សំ លាងទ្រី បានបន្ថែមថា រង្វង់មូលស្រអែម មានអង្កត់ផ្ចិតប្រវែង ៤០ ម៉ែត្រ កំពស់ ៦.៤ ម៉ែត្រ ផ្ទៃក្រឡា១២៥៦ ម៉ែត្រការ៉េ និងមានបរិមាត្រប្រវែង ១២៥.៦៦ ម៉ែត្រ ។ រូបសំណាកតួប្រាសាទនៅចំកណ្តាលរង្វង់មូលនេះ គឺយកលំនាំតាមគោបុរៈទី៥ នៃប្រាសាទព្រះវិហារ ហើយរូបសំណាកដែលស្ថិតនៅចំកណ្តាលរង្វង់មូលនេះទៀតសោតមានទំហំស្មើនឹង ៧០% នៃតួប្រាសាទដើម។ រង្វង់មូលស្រអែម មានទីតាំង ស្ថិតនៅលើផ្លូវជាតិលេខ៦២ ដែលជាចំណុចផ្លូវប្រសព្វផ្លូវបែកជា៣ ក្នុងការធ្វើដំណើរឡើងទៅប្រាសាទព្រះវិហារ ទៅខេត្តឧត្ដរមានជ័យ និងក្រុងព្រះវិហារ៕