បន្ទាប់ពីកម្ដៅកម្រិតបំបែកកំណត់ត្រាកាលពីសប្តាហ៍មុន ពេលនេះ អឺរ៉ុបខាងកើត និងផ្នែកខាងលិចនៃប្រទេសរុស្ស៊ី នឹងបន្តជួបប្រទះនូវអាកាសធាតុក្តៅ ដែលមិនសមស្របតាមរដូវកាលបន្ថែមទៀត នៅក្នុងប៉ុន្មានថ្ងៃខាងមុខនេះ។

ការផ្ទុះឡើងនៃកម្ដៅពាក់កណ្តាលនិទាឃរដូវ បានចាប់ផ្តើមនៅសប្តាហ៍មុន នៅពេលសីតុណ្ហភាពឡើងដល់កម្រិតខ្ពស់ជាង ២០អង្សាសេ នៅភាគខាងកើតអាល្លឺម៉ង់ និងប៉ូឡូញ។ គិតត្រឹមថ្ងៃសុក្រសប្ដាហ៍មុន ទីក្រុងឆ្នេរសមុទ្រភាគខាងជើង Łeba របស់ប៉ូឡូញ បានកត់ត្រាសីតុណ្ហភាពអតិបរមា ២៩,៦អង្សាសេ ដែលជាតួលេខជិត ២០អង្សាសេ លើសមធ្យមភាគខែមេសា របស់ទីក្រុងនេះ។

នៅចុងសប្តាហ៍មុន កម្ដៅក៏រាលដាលឆ្ពោះទៅភាគខាងកើតក្នុងតំបន់បាល់ទិក និងភាគខាងលិចរុស្ស៊ី ដែលនាំមកនូវសីតុណ្ហភាពបំបែកកំណត់ត្រានៅទីនោះ ក្នុងពេលថ្ងៃ និងយប់។ នៅលីទុយអានី តំបន់ចំនួន៤ បានឡើងកម្ដៅលើស ២៩អង្សាសេ កាលពីថ្ងៃសុក្រ ដោយបំបែកកំណត់ត្រាសីតុណ្ហភាពអតិបរមាក្នុងខែមេសា របស់ប្រទេស នៃតួលេខ ២៣,១អង្សាសេ កាលពី ៦៦ឆ្នាំមុនក្នុងឆ្នាំ១៩៥៩។

ប្រទេសជិតខាង ឡាតវី និង អេស្តូនី ក៏បង្កើតកំណត់ត្រាសីតុណ្ហភាពជាតិថ្មីក្នុងខែមេសា កាលពីចុងសប្តាហ៍មុន ដោយបានកត់ត្រាសីតុណ្ហភាពអតិបរមា ២៨,៤អង្សាសេ និង ២៨,៨អង្សាសេ រៀងគ្នា។ ខណៈដែលមាននិន្នាការចុះត្រជាក់បន្តិចនៅចុងសប្តាហ៍នេះ ផ្នែកធំទូលាយនៃសម្ពាធខ្ពស់ ដែលផ្តោតលើរុស្ស៊ី ទំនងជាបង្កើនសីតុណ្ហភាពលើសកម្រិតមធ្យម អំឡុងពេលភាគច្រើននៃសប្តាហ៍នេះ៕