ប្រទេសឥណ្ឌា បានប្រកាសនូវវិធានការណ៍ជាច្រើនដើម្បីបន្ទាបទំនាក់ទំនងរបស់ខ្លួនជាមួយប៉ាគីស្ថាន កាលពីថ្ងៃពុធ (២៣ មេសា) រយៈពេលមួយថ្ងៃបន្ទាប់ពីពួកសកម្មប្រយុទ្ធសង្ស័យថាបានសម្លាប់ក្រុមបុរស ដែលជាអ្នកទេសចរ ២៦នាក់ នៅឯទីតាំងទេសចរណ៍មួយនៅតំបន់ កាស្មៀរ (Kashmir) ក្នុងការវាយប្រហារដ៏អាក្រក់បំផុតលើជនស៊ីវិលនៅក្នុងប្រទេសនេះអស់ពេលជិតពីរទសវត្សរ៍។

ចំណងការទូតរវាងរវាងប្រទេសជិតខាងអាស៊ីខាងត្បូង ដែលមានអាវុធនុយក្លេអែរនេះ មានភាពទន់ខ្សោយយូរមកហើយ សូម្បីតែមុនពេលវិធានការចុងក្រោយត្រូវបានប្រកាសក៏ដោយ ក្នុងពេលដែលប៉ាគីស្ថាន បានបណ្តេញបេសកជនរបស់ឥណ្ឌា ហើយមិនបានដាក់ឯកអគ្គរដ្ឋទូតរបស់ខ្លួននៅក្នុងទីក្រុងញូវដេលី បន្ទាប់ពីឥណ្ឌា បានដកហូតឋានៈពិសេសនៃតំបន់កាស្មៀរ ក្នុងឆ្នាំ២០១៩។

កាលពីថ្ងៃពុធ រដ្ឋមន្ត្រីការបរទេសឥណ្ឌា លោក Vikram Misri បានប្រាប់សារព័ត៌មានខ្លីមួយថា ការជាប់ពាក់ព័ន្ធឆ្លងព្រំដែនក្នុងការវាយប្រហារកាស្មៀរ ត្រូវបានគូសបញ្ជាក់នៅក្នុងកិច្ចប្រជុំគណៈរដ្ឋមន្ត្រីសន្តិសុខពិសេស ដោយជំរុញឱ្យប្រទេសនេះធ្វើសកម្មភាពប្រឆាំងនឹងប៉ាគីស្ថាន។ លោកនិយាយថា ទីក្រុងញូវដែលី នឹងផ្អាកជាបន្ទាន់នូវសន្ធិសញ្ញាដែនទឹក Indus ឆ្នាំ១៩៦០ "រហូតដល់ប៉ាគីស្ថាន គួរឱ្យជឿជាក់ និងដកការគាំទ្ររបស់ខ្លួនចំពោះអំពើភេរវកម្មឆ្លងព្រំដែន"។ នេះជាវិធានការមួយក្នុងចំណោមវិធានការជាច្រើនទៀតដែលឥណ្ឌា បានប្រកាស។

មិនមានការឆ្លើយតបភ្លាមៗចំពោះការប្រកាសរបស់ឥណ្ឌា ពីការិយាល័យការបរទេសប៉ាគីស្ថានទេ។ គួរឱ្យដឹងថា ប៉ាគីស្ថាន ពឹងផ្អែកខ្លាំងលើទឹក ដែលហូរចុះពីប្រព័ន្ធទន្លេក្នុងសន្ធិសញ្ញានេះពីតំបន់កាស្មៀរ របស់ឥណ្ឌា សម្រាប់តម្រូវការវារីអគ្គិសនី និងប្រព័ន្ធធារាសាស្រ្តរបស់ខ្លួន។ ការផ្អាកសន្ធិសញ្ញានេះនឹងអនុញ្ញាតឱ្យឥណ្ឌា បដិសេធប៉ាគីស្ថាន នូវចំណែកដែនទឹករបស់ខ្លួន៕