សហភាពអឺរ៉ុប បានដាក់ការផាកពិន័យលើក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក Apple និង ក្រុមហ៊ុនMeta ពីបទបំពានច្បាប់របស់សហភាពអឺរ៉ុប ដែលបានតាក់តែងឡើងដើម្បីធានាឱ្យមានការប្រកួតប្រជែងដោយយុត្តិធម៌នៅក្នុងទីផ្សារឌីជីថល។

គណៈកម្មការអឺរ៉ុប បានប្រកាសចំណាត់ការនេះកាលពីថ្ងៃពុធ ដោយនិយាយថាក្រុមហ៊ុនទាំងពីរ មិនបានអនុវត្តតាមច្បាប់ទីផ្សារឌីជីថល។

អឺរ៉ុបនិយាយថា ក្រុមហ៊ុន Apple បានបំពានច្បាប់ ព្រោះក្រុមហ៊ុនបានរឹតត្បិតឱកាសរបស់អ្នកបង្កើតកម្មវិធី ក្នុងការផ្តល់ជូនអតិថិជនតាមរយៈបណ្តាញចែកចាយនៅខាងក្រៅកម្មវិធី App Store របស់ខ្លួន។

គណៈកម្មាការ បាននិយាយថា ក្រុមហ៊ុន Meta មិនអនុវត្តតាម ព្រោះតែក្រុមហ៊ុននេះតម្រូវឱ្យអ្នកប្រើប្រាស់ ព្រមព្រៀងលើការបញ្ចូលទិន្នន័យផ្ទាល់ខ្លួនសម្រាប់ការផ្សាយពាណិជ្ជកម្មផ្ទាល់ខ្លួន ឬបង់ថ្លៃជាវសម្រាប់សេវាកម្មគ្មានការផ្សាយពាណិជ្ជកម្ម។

គណៈកម្មការបាននិយាយថា ខ្លួនបានពិន័យក្រុមហ៊ុន Apple ចំនួន៥០០លានអឺរ៉ូ ស្មើនឹង៥៧០លានដុល្លារ និងក្រុមហ៊ុន Meta ចំនួន២០០លានអឺរ៉ូ ឬប្រហែល២៣០លានដុល្លារ។ នេះជាលើកទីមួយហើយដែលសហភាពអឺរ៉ុប បានដាក់ការផាកពិន័យផ្អែកលើច្បាប់ដែលបានចូលជាធរមានពេញលេញ កាលពីខែមីនា ឆ្នាំមុន។ ច្បាប់នេះ អនុញ្ញាតឱ្យគណៈកម្មាការពិន័យក្រុមហ៊ុននានាដែលមិនអនុវត្តតាមច្បាប់រហូតដល់១០ភាគរយនៃប្រាក់ចំណូលប្រចាំឆ្នាំជាសកលរបស់ក្រុមហ៊ុន។

មន្ត្រីក្រុមហ៊ុន Meta បាននិយាយថា គណៈកម្មការអឺរ៉ុបកំពុងព្យាយាមរារាំងអាជីវកម្មអាមេរិកដែលទទួលបានជោគជ័យ ហើយកំពុងបង្ខំឱ្យក្រុមហ៊ុន Meta ផ្លាស់ប្តូរគំរូអាជីវកម្មរបស់ខ្លួន។ ក្រុមហ៊ុនបាននិយាយបន្ថែមថា គណៈកម្មការ ក៏កំពុងធ្វើឲ្យប៉ះពាល់ដល់អាជីវកម្ម និងសេដ្ឋកិច្ចរបស់អឺរ៉ុបផងដែរ។