ភ្នំពេញ៖ ក្រសួងឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ កំពុងពិចារណាអនុវត្តគោលនយោបាយមួយចំនួន ដើម្បីលើកទឹកចិត្តឱ្យប្រតិបត្តិករអភិវឌ្ឍន៍ក្នុងវិស័យទឹកស្អាត ដែលមានសមត្ថភាពហិរញ្ញវត្ថុ និងមានប្រភពទឹកគ្រប់គ្រាន់ពង្រីកសមត្ថភាពផ្គត់ផ្គង់ទឹកស្អាត និងពង្រីកបណ្ដាញទឹកស្អាត រួមទាំងការលក់ទឹកដុំឱ្យតំបន់ដែលប្រឈមនឹងការខ្វះប្រភពទឹក។
ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងក្នុងកិច្ចប្រជុំ ស្តីពីការវាយតម្លៃលទ្ធផលគម្រោងក្រោមកិច្ចសហប្រតិបត្តិការរវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាមួយធនាគារអភិវឌ្ឍន៍អាស៊ី ADB ថា បច្ចុប្បន្នក្រសួងកំពុងរៀបចំសេចក្តីព្រាងច្បាប់ គ្រប់គ្រងការផ្គត់ផ្គង់ទឹកស្អាត និងបានបង្កើតនូវយន្តការសម្របសម្រួលរវាងស្ថាប័នដែលមានការពាក់ព័ន្ធ ដើម្បីពង្រីកវិសាលភាព នៃការផ្គត់ផ្គង់ទឹកស្អាត ជូនប្រជាពលរដ្ឋឱ្យបានគ្រប់រូប។
ចំណែកទាក់ទងនឹងការអនុវត្តគម្រោងក្រោមហិរញ្ញប្បទាន របស់ធនាគារអភិវឌ្ឍន៍អាស៊ី ADB ក្រសួងបានកំពុងអនុវត្តគម្រោងចំនួន ២ គឺគម្រោងផ្គត់ផ្គង់ទឹកស្អាតទីប្រជុំជន និងគម្រោងផ្គត់ផ្គង់ទឹកស្អាត និងអនាម័យនៅតាមបណ្តាខេត្តមកដល់ពេលនេះ ការអនុវត្តគម្រោងទាំងពីរ កំពុងដំណើរការទៅតាមផែនការដែលបានគ្រោងទុក។
ជុំវិញការអភិវឌ្ឍន៍ទឹកស្អាតនេះ, ឯកឧត្តមទេសរដ្ឋមន្ត្រី បញ្ជាក់ថា បើតាមការសិក្សាបានបង្ហាញឱ្យឃើញថា ចំនួនភូមិប្រមាណ ៥០% នៅទូទាំងប្រទេស មិនទាន់មានការផ្គត់ផ្គង់ទឹកស្អាតនៅឡើយ បច្ចុប្បន្នក្រសួងកំពុងខិតខំបន្ត ដើម្បីជម្រុញឲ្យសម្រេចតាមគោលនយោបាយផ្គត់ផ្គង់ទឹកស្អាតរបស់រាជរដ្ឋាភិបាល ដែលក្នុងនោះក្រសួងចាំបាច់ត្រូវមានហិរញ្ញប្បទានបន្ថែមទៀត សម្រាប់គាំទ្រដល់ប្រតិបត្តិករទឹកស្អាត ខណៈដែលកំណើនប្រជាជន ការអភិវឌ្ឍន៍ទីក្រុង ទីប្រជុំជន មានតម្រូវការប្រើប្រាស់ទឹកមានការកើនឡើងឥតឈប់ឈរ ក្រៅពីនេះក្រសួងកំពុងពិចារណាអនុវត្តនូវគោលនយោបាយមួយចំនួនផងដែរដូចជា ការលើកទឹកចិត្តឱ្យប្រតិបត្តិករទឹកស្អាត ដែលមានសមត្ថភាពហិរញ្ញវត្ថុ និងមានប្រភពទឹកគ្រប់គ្រាន់ ពង្រីកសមត្ថភាពផ្គត់ផ្គង់ទឹកស្អាត និងពង្រីកបណ្តាញទឹកស្អាត រួមទាំងការលក់ទឹកដុំឱ្យតំបន់ដែលប្រឈមនឹងការខ្វះប្រភពទឹក។
ពាក់ព័ន្ធគម្រោងទឹកស្អាតនេះ, លោក Srinivasan Palle Venkata ប្រធានប្រតិភូរបស់ធនាគារអភិវឌ្ឍន៍អាស៊ី ADB លើកឡើងថា គោលបំណងរបស់បេសកកម្ម ADB គឺដើម្បីស្វែងយល់អំពី ថាតើការជួយគាំទ្ររបស់ធនាគារអភិវឌ្ឍន៍អាស៊ី ADB នៅក្នុងវិស័យទឹកស្អាតនៅកម្ពុជាបានយ៉ាងណា? ហើយតើយើងអាចរៀនសូត្របានអ្វីខ្លះពីការគាំទ្រនេះ, ទាំងចំណុចល្អ និងចំណុចខ្វះខាត? ហើយតើបញ្ហាអ្វីខ្លះ ដែលក្រសួងមានបំណងស្នើសុំឱ្យ ADB បន្តជួយគាំទ្រ រួមជាមួយបញ្ហាកំពុងជួបប្រទះ ក្នុងការអនុវត្តគម្រោងនាពេលកន្លងមកផងដែរ៕ អត្ថបទ៖ សុន រ៉ាឌី