ក្រុមមន្ត្រី បាននិយាយថា ការវាយប្រហារដោយមីស៊ីល និងយានដ្រូនរបស់រុស្ស៊ីរួមបញ្ចូលគ្នា ទៅលើស្រុកជាច្រើននៃរដ្ឋធានីគីវរបស់ប្រទេសអ៊ុយក្រែន នាព្រឹកថ្ងៃព្រហស្បតិ៍នេះ បានបណ្តាលឲ្យមនុស្ស ២១នាក់ រងរបួស។

ដោយបានសរសេរនៅលើបណ្តាញសង្គម Telegram អភិបាលក្រុងលោក Vitali Klitschko បាននិយាយថា អគ្គិភ័យចំនួន ៦កន្លែង ត្រូវបានរាយការណ៍ នៅក្នុងស្រុក Sviatoshynskyi ភាគខាងលិចនៃកណ្តាលទីក្រុង ដែលបានបណ្តាលឲ្យមានការខូចខាតយ៉ាងធ្ងន់ធ្ងរ។ មនុស្ស ២១នាក់ កំពុងត្រូវបានព្យាបាល នៅក្នុងមន្ទីរពេទ្យ ក្នុងនោះមានកុមារ ៣នាក់។

លោក Klitschko បាននិយាយមុននេះថា អ្នករស់នៅក្នុងផ្ទះមួយ ត្រូវបានជាប់ខ្លួន នៅក្រោមគំនរបាក់ បែក។ ចំណែកអគ្គិភ័យ និងឧប្បត្តិហេតុនៃការធ្លាក់បំណែកដែក ត្រូវបានរាយការណ៍ នៅក្នុងតំបន់ផ្សេងទៀត។

នៅទីក្រុង Kharkiv ដែលជាទីក្រុងធំទី២របស់អ៊ុយក្រែន មានចម្ងាយ ៣០ គីឡូម៉ែត្រ (១៨ម៉ាយ) ពីព្រំដែនរុស្ស៊ី លោកអភិបាលក្រុង Ihor Terekhov បាននិយាយថា មីស៊ីលចំនួន ៧គ្រាប់ បានវាយប្រហារលើគោលដៅជាបន្តបន្ទាប់។ បង្អួចជាច្រើននៃអគារអាផាតដ៏ខ្ពស់មួយ ត្រូវរងការបំផ្លាញយ៉ាងដំណំ ប៉ុន្តែមិនមានការនិយាយអំពីអ្នកស្លាប់ និងរបួសទេ។

ក្នុងរយៈពេលមួយម៉ោង លោក Terekhov ក៏បានរាយការណ៍ពីការវាយប្រហារដោយយានដ្រូនមកលើទីក្រុងនេះផងដែរ ទោះបីជាមិនមានការបង្ហាញពីអ្នកស្លាប់ និងរងរបួសក៏ដោយ។