ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃព្រហស្បតិ៍ (២៤ មេសា) ថា មីស៊ីលរបស់រុស្ស៊ី ដែលបានប្រើវាយប្រហារពេលយប់លើអគារលំនៅដ្ឋានមួយកន្លែងក្នុងទីក្រុងគីវ និងបានសម្លាប់មនុស្ស ១២នាក់ ត្រូវបានផ្គត់ផ្គង់ដោយកូរ៉េខាងជើង នៅក្នុងការបញ្ជាក់របាយការណ៍មុននោះរបស់សារព័ត៌មានរ៉យទ័រ។

ប្រភពយោធាអ៊ុយក្រែន បានប្រាប់រ៉យទ័រថា មីស៊ីល KN-23 (KN-23A) របស់កូរ៉េខាងជើង បានវាយប្រហារប្លុកលំនៅដ្ឋានមួយកន្លែងនៅក្នុងតំបន់ Sviatoshynskyi ភាគខាងលិចនៃកណ្តាលទីក្រុងគីវ អំឡុងពេលការវាយប្រហារតាមអាកាសដ៏ធំដោយរុស្ស៊ី។

លោក Zelenskiy បាននិយាយនៅលើបណ្ដាញសង្គម X ថា "យោងតាមព័ត៌មានបឋម កងកម្លាំងរុស្ស៊ី បានប្រើមីស៊ីលបាលីស្ទិកដែលផលិតនៅកូរ៉េខាងជើង ហើយសេវាកម្មពិសេសរបស់អ៊ុយក្រែន កំពុងផ្ទៀងផ្ទាត់ព័ត៌មានលម្អិតទាំងអស់" ដោយមិនផ្តល់សេចក្ដីលម្អិតបន្ថែមនោះទេ។

រុស្ស៊ីមិនធ្វើអត្ថាធិប្បាយលើការលើកឡើងរបស់លោក Zelenskiy ឡើយ ហើយរុស្ស៊ី និងកូរ៉េខាងជើង បានបដិសេធយូរមកហើយលើការផ្ទេរអាវុធ ដែលនឹងបំពានបម្រាមរបស់អង្គការសហប្រជាជាតិ។

អ៊ុយក្រែន បានអះអាងថា កូរ៉េខាងជើង ផ្គត់ផ្គង់គ្រាប់កាំភ្លើងធំដ៏ច្រើនសន្ធឹកសន្ធាប់ ព្រមទាំងប្រព័ន្ធរ៉ូកែត កងទ័ពរាប់ពាន់នាក់ និងមីស៊ីលបាលីស្ទិក ដល់រុស្ស៊ី ដែលកងកម្លាំងទីក្រុងមូស្គូ បានចាប់ផ្តើមប្រើទៅវាយប្រហារប្រឆាំងនឹងអ៊ុយក្រែន នៅចុងឆ្នាំ២០២៣៕