រុស្ស៊ី រក្សាសិទ្ធិក្នុងការប្រើប្រាស់អាវុធនុយក្លេអ៊ែរ ក្នុងករណីដែលខ្លួនប្រឈមមុខនឹងការឈ្លានពានពីសំណាក់បណ្តាប្រទេសលោកខាងលិច នេះបើតាមការលើកឡើងរបស់មន្ត្រីសន្តិសុខជាន់ខ្ពស់របស់ទីក្រុងមូស្គូ គឺលោក Sergei Shoigu ដែលបាននិយាយក្នុងបទសម្ភាសន៍ជាមួយទីភ្នាក់ងារសារព័ត៌មានរដ្ឋ TASS កាលពីថ្ងៃព្រហស្បតិ៍ (២៤ មេសា)។

ការអត្ថាធិប្បាយរបស់លោក Shoigu កើតឡើងនៅពេលដែលលោកប្រធានាធិបតីអាមេរិក Donald Trump និងអនុប្រធានាធិបតី JD Vance បានព្រមានថា ទីក្រុងវ៉ាស៊ីនតោន អាចដើរចេញពីកិច្ចចរចារកដំណោះស្រាយសន្តិភាពនៅអ៊ុយក្រែន ប្រសិនបើមិនមានវឌ្ឍនភាពលើកិច្ចព្រមព្រៀងឆាប់ៗទេនោះ។

លោក Shoigu ដែលបានបម្រើការជាងមួយទសវត្សរ៍ជារដ្ឋមន្ត្រីការពារជាតិរុស្ស៊ី រហូតដល់លោកបានផ្លាស់ទៅដឹកនាំក្រុមប្រឹក្សាសន្តិសុខដ៏មានឥទ្ធិពលនៅក្នុងការរុះរើរដ្ឋាភិបាលកាលពីឆ្នាំមុន បានលើកឡើងពីការកែប្រែគោលលទ្ធិនុយក្លេអ៊ែររបស់ក្រុងមូស្គូ ដែលបានអនុម័តដោយលោកប្រធានាធិបតី Vladimir Putin កាលពីខែវិច្ឆិកា។

នៅក្រោមកំណែថ្មីនោះ រុស្ស៊ីអាចពិចារណាលើការវាយប្រហារនុយក្លេអ៊ែរ ជាការឆ្លើយតបទៅនឹងការវាយប្រហារធម្មតាណាមួយលើរុស្ស៊ី ឬសម្ព័ន្ធមិត្ត បេឡារុស របស់ខ្លួន ដែល "បង្កើតជាការគំរាមកំហែងធ្ងន់ធ្ងរដល់អធិបតេយ្យភាព និង/ឬ បូរណភាពទឹកដីរបស់ភាគីទាំងពីរ"៕