អាជ្ញាធរសុខាភិបាលក្នុងតំបន់ និងក្រុមសង្រ្គោះបាននិយាយថា ការវាយប្រហារតាមអាកាសជាច្រើនលើកឥតឈប់ឈររបស់អ៊ីស្រាអែល ទូទាំងតំបន់ហ្កាហ្សាស្រ្ទីប បានសម្លាប់មនុស្សយ៉ាងតិច ៥០នាក់ កាលពីថ្ងៃព្រហស្បតិ៍ (២៤ មេសា)។

ការវាយប្រហារមួយក្នុងចំណោមនោះ ត្រូវចំប៉ុស្តិ៍នគរបាលក្នុងទីក្រុង Jabalia ភាគខាងជើងហ្កាហ្សា ដោយបានសម្លាប់មនុស្សយ៉ាងហោច ១០នាក់ ហើយយោធាអ៊ីស្រាអែល និយាយថា ជាការវាយប្រហារមណ្ឌលបញ្ជាការមួយរបស់ក្រុមហាម៉ាស និងក្រុមជីហាតអ៊ីស្លាម។

ក្រុមគ្រូពេទ្យបានបញ្ជាក់តួលេខ ១០នាក់នោះ ប៉ុន្តែអត្តសញ្ញាណអ្នកស្លាប់ថាជាក្រុមសកម្មប្រយុទ្ធឬយ៉ាងណា នៅមិនទាន់ច្បាស់ទេ។

អាជ្ញាធរសុខាភិបាលក្នុងតំបន់និយាយថា ការវាយប្រហារដាច់ដោយឡែកពីគ្នានៅទូទាំងតំបន់ហ្កាហ្សា របស់អ៊ីស្រាអែល បានសម្លាប់មនុស្សយ៉ាងតិច ១២នាក់ នៅលំនៅឋានមួយក្នុងក្រុង Jabalia ដដែលនេះ និងប្រហែលជិត ៣០នាក់ស្លាប់នៅកន្លែងផ្សេងទៀត ដែលនាំឱ្យចំនួនស្លាប់សរុបថ្ងៃព្រហស្បតិ៍ ឡើងក្នុងរង្វង់តួលេខ ៥០នាក់។

ចាប់តាំងពីបទឈប់បាញ់ក្នុងខែមករា បានដួលរលំនៅថ្ងៃទី១៨ ខែមីនា មក ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ១.៩០០នាក់ ភាគច្រើនជាជនស៊ីវិល នេះបើយោងតាមអាជ្ញាធរសុខាភិបាលហ្កាហ្សា ហើយមនុស្សរាប់សែននាក់ត្រូវបានជម្លៀស ខណៈអ៊ីស្រាអែល បានដណ្តើមយកអ្វីដែលហៅថាតំបន់ទ្រនាប់នៃទឹកដីហ្កាហ្សា៕