អ្នកស្រុកជាច្រើននៅក្នុងទីក្រុងអ៊ីស្តង់ប៊ុល របស់ប្រទេសទួរគី បានសម្រាកពេលយប់នៅទីវាលខាងក្រៅ ដោយភ័យខ្លាចមិនហ៊ានត្រឡប់ទៅផ្ទះសម្បែងរបស់ពួកគេវិញទេ បន្ទាប់ពីមានការរញ្ជួយដីខ្លាំងក្លា និងការរង្គើដីជាបន្តបន្ទាប់ជាង ១៨០លើក ដែលធ្វើឱ្យមនុស្សជាង ២០០នាក់របួស។

រញ្ជួយដីកម្រិត ៦,២រ៉ិចទ័រ ដែលបានវាយប្រហារកាលពីថ្ងៃពុធសប្ដាហ៍នេះ បានប៉ះពាល់យ៉ាងធ្ងន់ធ្ងរដល់ទីក្រុងដែលអ្នកស្រុក ១៦លាននាក់នោះ ដោយធ្វើឱ្យពលរដ្ឋភ័យខ្លាច និងប្រុងប្រយ័ត្នខ្ពស់ចំពោះគ្រោះមហន្តរាយបន្ថែមទៀតដែលអាចបំផ្លិចបំផ្លាញខ្លាំង។ មិនមានរបាយការណ៍ពីការខូចខាតធ្ងន់ធ្ងរទេ ប៉ុន្តែរញ្ជួយដីដែលមានអារម្មណ៍ដឹងខ្លាំងបំផុតនៅទីក្រុងអ៊ីស្តង់ប៊ុលក្នុងពេលប៉ុន្មានឆ្នាំចុងក្រោយនេះ បានបង្កឱ្យមានការភ័យស្លន់ស្លោដ៏រីករាលដាល។

ដោយខ្លាចការរញ្ជួយដីខ្លាំងជាងនេះ អ្នកស្រុកបានទៅជ្រកកោននៅតាមទីវាលខាងក្រៅផ្សេងៗ ដោយអ្នកខ្លះសម្រាកក្នុងរថយន្ត ឬបោះតង់នៅឧទ្យាន និងកន្លែងបើកចំហផ្សេងទៀត។ រញ្ជួយដីនេះមានជម្រៅរាក់ ១០គីឡូម៉ែត្រ យោងតាមការស្ទាបស្ទង់ភូគ្ពសាស្ត្រអាមេរិក ដោយចំណុចកណ្តាលស្ថិតនៅប្រហែល ៤០គីឡូម៉ែត្រ ភាគនិរតីក្រុងអ៊ីស្តង់ប៊ុល ក្នុងសមុទ្រម៉ាម៉ារ៉ា នឹងរង្គើដល់ខេត្តជិតខាង។

គួរឱ្យដឹងថា សណ្ឋានដីប្រទេសទួរគី ស្ថិតលើបន្ទាត់ទិចតូនិក ឬហៅថារង្វង់រង្វិលរញ្ជួយដីដ៏ធំចំនួនពីរ ហើយគ្រោះរញ្ជួយបែបនេះកើតឡើងជាញឹកញាប់។ រញ្ជួយដីកម្រិត ៧,៨រ៉ិចទ័រ កាលពីថ្ងៃទី០៦ ខែកុម្ភៈ ឆ្នាំ២០២៣ នៅទួរគី បានឆក់យកជីវិតមនុស្សជាង ៥៣.០០០នាក់ និងបង្កការបំផ្លិចបំផ្លាញ ឬខូចខាតអគាររាប់រយរាប់ពាន់ខ្នង៕