រយៈពេលជិតមួយខែបានកន្លងផុតទៅ ចាប់តាំងពីការរញ្ជួយដីដ៏ធំ បានវាយប្រហារភាគកណ្តាលសហភាពមីយ៉ាន់ម៉ា ដែលបានឆក់យកជីវិតមនុស្សជាង ៣.៧០០នាក់ នេះបើយោងតាមរបបយោធា។

មន្ត្រីជាន់ខ្ពស់អង្គការសហប្រជាជាតិ និយាយថា ពួកគេនឹងបង្កើនការគាំទ្រដល់ស្ត្រី និងកុមារ ដែលរងផលប៉ះពាល់។ ប្រព័ន្ធផ្សព្វផ្សាយ NHK បានសម្ភាសន៏ លោកស្រី Kanni Wignaraja ដែលបម្រើការជានាយកប្រចាំតំបន់សម្រាប់អាស៊ីនិងប៉ាស៊ីហ្វិក នៅក្នុងកម្មវិធីអភិវឌ្ឍន៍អង្គការសហប្រជាជាតិ កាលពីថ្ងៃព្រហស្បតិ៍ ដោយលោកស្រី បាននិយាយអំពីស្ថានភាពនៅតំបន់ Sagaing ភាគពាយ័ព្យ ដែលស្ថិតនៅជិតចំណុចកណ្តាលនៃការរញ្ចួយដី។

លោកស្រីនិយាយថា ហេដ្ឋារចនាសម្ព័ន្ធមួយចំនួនបាននិងកំពុងស្តារឡើងវិញ ប៉ុន្តែស្ថាប័នវេជ្ជសាស្ត្រនៅតែខូចខាត។ នោះមានន័យថា ស្ត្រី និងកុមារ ខ្វះលទ្ធភាពទទួលបានការថែទាំសុខភាពសំខាន់ៗ។

លោកស្រី Wignaraja ក៏បានចង្អុលបង្ហាញពីតម្រូវការនៃការធានាបានឯកជនភាព និងសុវត្ថិភាពសម្រាប់ស្ត្រី និងកុមារ ដែលត្រូវបានបង្ខំឱ្យជម្លៀសខ្លួនទៅនៅក្នុងទីជម្រកបណ្តោះអាសន្ន។ «នៅក្នុងគ្រោះមហន្តរាយទាំងនេះ អ្វីដែលកើតឡើងគឺទីជម្រកបណ្តោះអាសន្ន អ្នកត្រូវតែធ្វើឱ្យប្រាកដថាមានសុវត្ថិភាពសម្រាប់ស្ត្រី និងកុមារ ព្រោះអំពើហិង្សាអាចកើនឡើង ឧបទ្ទវហេតុនៃការរំលោភបំពានអាចកើនឡើង។

នៅមីយ៉ាន់ម៉ា ទាំងរដ្ឋាភិបាលយោធា និងកងកម្លាំងគាំទ្រលទ្ធិប្រជាធិបតេយ្យ បានប្រកាសបទឈប់បាញ់បណ្តោះអាសន្ន ដើម្បីជួយសម្រួលដល់កិច្ចខិតខំប្រឹងប្រែងសង្គ្រោះ និងការកសាងឡើងវិញ។ លោកស្រី Wignaraja និយាយថា ការប្រយុទ្ធគ្នានៅតែបន្តនៅផ្នែកមួយចំនួនរបស់មីយ៉ាន់ម៉ា។ លោកស្រី បានអំពាវនាវឱ្យមានការប្តេជ្ញាចិត្តជាអន្តរជាតិដើម្បីនាំមកនូវបទឈប់បាញ់អចិន្ត្រៃយ៍ ដើម្បីពន្លឿនការកសាងសហភាពនេះឡើងវិញ។