នាយករដ្ឋមន្ត្រីប្រទេសក្រិក លោក Kyriakos Mitsotakis បានប្រកាសកាលពីថ្ងៃព្រហស្បតិ៍ថា ការបន្ថែម រយៈពេល៤៥ថ្ងៃ ដល់ថ្ងៃផុតកំណត់ សម្រាប់ការបោសសម្អាតព្រៃដែលដុះលើទ្រព្យឯកជន ជាផ្នែកនៃកិច្ចខិតខំប្រឹងប្រែងរបស់ប្រទេស ដើម្បីត្រៀមឱ្យកាន់តែប្រសើរសម្រាប់អ្វីដែលត្រូវបានគេរំពឹងថានឹងក្លាយជារដូវកាលចំហេះព្រៃដ៏មហន្តរាយមួយផ្សេងទៀត។

លោក Mitsotakis បានបញ្ជាក់ពីតម្រូវការសម្រាប់កិច្ចសហប្រតិបត្តិការសាធារណៈ ក្នុងការឈូសឆាយដី ដោយចាត់ទុកថាជាខ្សែការពារដ៏សំខាន់ដែលបានបង្ហាញឱ្យឃើញពីប្រសិទ្ធភាពក្នុងការការពារលំនៅឋាន និងជួយដល់កិច្ចខិតខំប្រឹងប្រែងពន្លត់អគ្គិភ័យ នៅពេលដែលប្រទេសនេះជួបប្រទះគ្រោះអគ្គិភ័យដ៏អាក្រក់។

លោក Mitsotakis និយាយថា «មានអ្នកពន្លត់អគ្គិភ័យកាន់តែច្រើន ហើយចំនួនអ្នកស្ម័គ្រចិត្តដែលត្រូវបានបណ្តុះបណ្តាលក៏បានបន្តកើនឡើង»។ ក្រសួងការពារជនស៊ីវិលនិងវិបត្តិអាកាសធាតុ បានបញ្ជាក់ថា រដូវចំហេះព្រៃនៅឆ្នាំនេះ នឹងចាប់ផ្តើមនៅថ្ងៃទី១ ខែឧសភា ដូចធម្មតា។ ការសម្របសម្រួលអន្តរទំនាក់ទំនងដ៏ប្រសើរ និងការវិនិយោគនៅក្នុងប្រព័ន្ធព្រមានជាមុន គឺជាចំណុចសំខាន់នៃផែនការឆ្លើយតបចំពោះអគ្គិភ័យនៅឆ្នាំ ២០២៥នេះ។

យោងតាមអង្គភាពសេវាពន្លត់អគ្គីភ័យ Hellenic បានឲ្យដឹងថា ចំហេះព្រៃជាង ៨.០០០កន្លែង បានកើតឡើងក្នុងរដូវចំហេះព្រៃឆ្នាំ២០២៤ ដែលក្នុងនោះមនុស្ស ៧នាក់បានស្លាប់ រួមទាំងអ្នកពន្លត់អគ្គិភ័យពីរនាក់ លំនៅឋានចំនួន២១០ខ្នងត្រូវបានបំផ្លាញ និងផ្ទៃដីព្រៃជាង១៥០.០០០ហិកតាត្រូវបានឆាបឆេះ ដោយការខូចខាតសរុបលើសពី ១,២ពាន់លានអឺរ៉ូ (១,៣៧ពាន់លានដុល្លារអាមេរិក) ដែលកើនឡើង៣៥ភាគរយ ពីឆ្នាំ២០២៣។