ឥណ្ឌូនេស៊ី កំពុងស្ថិតក្នុងបេសកកម្មដ៏មានមហិច្ឆតាមួយក្នុងការផ្តល់អាហារឥតគិតថ្លៃដល់សិស្សសាលា ៨០លាននាក់ ប៉ុន្តែរឿងនេះត្រូវគ្របដណ្ដប់ដោយស្រមោលអាប់អួរ ហើយមិនប្រាកដជាដើរតាមផែនការទេ។ សិស្សសាលាជិត ៨០នាក់ នៅទូទាំងវិទ្យាល័យចំនួនពីរនៅតំបន់ Cianjur ភាគខាងត្បូងរដ្ឋធានីហ្សាការតា ធ្លាក់ខ្លួនឈឺពីការពុលអាហារ បន្ទាប់ពីទទួលទានអាហារឥតគិតថ្លៃនោះក្នុងសប្តាហ៍នេះ។

ទាំងនេះជាករណីពុលអាហារចុងក្រោយបង្អស់ ដែលត្រូវបានផ្សារភ្ជាប់ទៅនឹងកម្មវិធី ដែលជាគោលនយោបាយដ៏សំខាន់របស់លោកប្រធានាធិបតី Prabowo Subianto។

សមត្ថកិច្ចដែលស៊ើបអង្កេតករណីនេះនិយាយថា មូលហេតុសង្ស័យគឺដោយសារការរៀបចំអាហារធ្វេសប្រហែស។ សំណាកពីកម្អួតរបស់សិស្ស ត្រូវបានបញ្ជូនទៅធ្វើតេស្តមន្ទីរពិសោធន៍ ហើយនគរបាលនិយាយថា ពួកគេបានសាកសួរមនុស្សដែលរៀបចំអាហារទាំងន៉ រាប់តាំងពីចុងភៅ និងអ្នកវេចខ្ចប់ រហូតដល់បុគ្គលិកដឹកជញ្ជូន។

នៅទូទាំងពិភពលោក កម្មវិធីដែលផ្តល់អាហារឥតគិតថ្លៃដល់សិស្សានុសិស្ស បានបង្ហាញពីប្រសិទ្ធភាពក្នុងការកែលម្អសុខភាព និងដំណើរការសិក្សា។ ប៉ុន្តែកម្មវិធីតម្លៃ ២៨ពាន់លានដុល្លាររបស់ឥណ្ឌូនេស៊ី ដែលហាក់មានតម្លៃថ្លៃបំផុតនេះ បានក្លាយជាគោលដៅនៃក្ដីបារម្ភអំពីសុវត្ថិភាពម្ហូបអាហារ និងការតវ៉ាដ៏ក្តៅគគុក៕