អគ្គលេខាធិការអង្គការណាតូលោក Mark Rutte បាននិយាយក្រោយជំនួបពិភាក្សាការងារជាមួយប្រធានាធិបតីសហរដ្ឋអាមេរិកលោក Donald Trump កាលពីថ្ងៃព្រហស្បតិ៍ថា សហរដ្ឋអាមេរិក និងសម្ព័ន្ធមិត្តអឺរ៉ុប បានឯកភាពគ្នាថា រុស្ស៊ីគឺជាការគំរាមកំហែងរយៈពេលវែង ។

លោក Rutte និយាយប្រាប់ក្រុមអ្នកសារព័ត៌មាននៅក្រៅសេតវិមានថា ពួកយើងឯកភាពទាំងអស់គ្នានៅអង្គការណាតូថា រុស្ស៊ីគឺជាការគំរាមកំហែងរយៈពេលវែងដល់ដែនដីណាតូ ដល់ដែនទាំងមូលរបស់អឺរ៉ុប-អាត្លង់ទិក ។

លោកបាននិយាយផងដែរថា សហរដ្ឋអាមេរិកនៅតែបន្តប្តេជ្ញាចិត្តចំពោះអង្គការណាតូ បើទោះបីជាទីក្រុងវ៉ាស៊ីនតោនផ្តោតសំខាន់ច្រើនជាងមុនលើតំបន់អាស៊ី-ប៉ាស៊ីហ្វិកក៏ដោយ ។

លោកថា ពួកយើងមាននូវជំនួបដ៏ល្អជាមួយលោកប្រធានាធិបតី និងក្រុមការងាររបស់លោក ជាមួយលោករដ្ឋមន្រ្តី Rubio លោករដ្ឋមន្រ្តី Hegseth និងលោក Mike Waltz ដែលជាទីប្រឹក្សាសន្តិសុខជាតិ ។

គួរឲ្យដឹងថា កាលពីថ្ងៃព្រហស្បតិ៍ម្សិលមិញ លោក Trump បានសង្កត់ធ្ងន់លើសារៈសំខាន់របស់អង្គការណាតូចំពោះអឺរ៉ុប ប៉ុន្តែលោកថា សម្ព័ន្ធមិត្តមួយនេះនឹងគ្មានឥទ្ធិពលឡើយ ប្រសិនបើគ្មានសហរដ្ឋអាមេរិក ។ 

លោក Trump បានលើកឡើងផងដែរ ពីបញ្ហានៃការរួមចំណែកផ្នែកហិរញ្ញវត្ថុដើម្បីគាំទ្រដល់ ណាតូ ហើយអឺរ៉ុបគួរតែបង្កើនការចំណាយបន្ថែមទៀត ពីព្រោះថា សហរដ្ឋអាមេរិកបានចំណាយច្រើនជាងគេរួចទៅហើយ ៕