តាមសេចក្តីរាយការណ៍របស់ប្រព័ន្ធផ្សព្វផ្សាយ BFMTV បានឲ្យដឹងថា ប្រធានាធិបតី លោក Emmanuel Macron បានបញ្ជាក់ថា បារាំងមិនផ្លាស់ប្តូរគោលជំហររបស់ខ្លួននោះទេ ដែលថា ខ្លួនថ្កោលទោសសង្គ្រាមលុកលុយរបស់រុស្ស៊ី លើប្រទេសអ៊ុយក្រែន ហើយស្វែងរកសន្តិភាព ប៉ុន្តែសម្រាប់រឿងនេះ ចាំបាច់ត្រូវបង្ខំឲ្យមេដឹកនាំរុស្ស៊ី លោក Vladimir Putin ឈប់និយាយកុហក។

ប្រធានាធិបតីបារាំងបានបញ្ជាក់ថា ជំហររបស់ប្រទេសលោក គឺនៅដដែល និងមិនផ្លាស់ប្តូរឡើយ។ លោក Macron បានបន្តថា វាតំណាងឲ្យអធិបតេយ្យភាពរបស់ប្រជាជន និងបូរណភាពដែនដី ដោយគោរពច្បាប់អន្តរជាតិ។ ដូច្នេះហើយ លោកបានថ្កោលទោសជំហររបស់លោក Putin ដែល «បន្តទម្លាក់គ្រាប់បែក» លើអ៊ុយក្រែន។

លោក Macron បានរំលឹកពីការពិតសាមញ្ញចំនួន២ គឺថា អ្នកលុកលុយ ក្នុងសង្រ្គាមនេះ គឺរុស្ស៊ី ជនរងគ្រោះនៃការលុកលុយ គឺអ៊ុយក្រែន ប៉ុន្តែសន្តិភាពអាចសម្រេចបាន។ លោកបាននិយាយថា៖ «នោះហើយជាមូលហេតុដែលយើងតែងតែថ្កោលទោសសង្រ្គាមលុកលុយរបស់រុស្ស៊ី។ ហើយឥឡូវនេះ យើងនៅតែបែបហ្នឹងដដែល។ តែយ៉ាងណាក្ដី ខ្ញុំសង្ឃឹមថា សន្តិភាពអាចកើតឡើង»។

លោក Macron បានថ្កោលទោសលោក Putin ដែលនៅក្នុងកិច្ចពិភាក្សាជាមួយអ្នកចរចាអាមេរិក និយាយថា លោកចង់បានសន្តិភាព ប៉ុន្តែនៅពេលជាមួយគ្នានោះ នៅតែបន្តទម្លាក់គ្រាប់បែកលើទីក្រុងនានារបស់អ៊ុយក្រែន ដោយបណ្ដាលឲ្យមនុស្សបន្តបាត់បង់ជីវិត។ លោកប្រធានាធិបតីបារាំងសង្កត់ធ្ងន់ថា ដូច្នេះ សហរដ្ឋអាមេរិកត្រូវតែធ្វើយ៉ាងណាឲ្យលោក Putin ឈប់កុហក៕