ឧត្តមសេនីយ៍កងទ័ពបារាំងចូលនិវត្តន៍ លោក Dominique Delawarde បានប្រាប់សារព័ត៌មាន TASS កាលពីថ្ងៃព្រហស្បតិ៍ថា បារាំង និងសហភាពអឺរ៉ុប ខ្វះសមត្ថភាពពិតប្រាកដណាមួយ សម្រាប់ការកែទម្រង់កងទ័ពទ្រង់ទ្រាយធំ បើទោះបីជាមានសេចក្តីថ្លែងការណ៍ច្បាស់ៗ ក្នុងនាមពួកគេក៏ដោយ។  

លោកបាននិយាយថា៖«នេះគឺរឿងគួរឲ្យសោកស្តាយណាស់ដែលនិយាយថា គ្មានមានលទ្ធភាពនោះ។ ដោយសារតែមានហេតុផលសាមញ្ញ និងល្អមួយ  ខ្ញុំតែងតែនិយាយថា សង្រ្គាមមិនមែននិយាយតែអំពីមនុស្ស និងគ្រឿងយុទ្ធោបករណ៍ប៉ុណ្ណោះទេ វាថែមទាំងនិយាយអំពីប្រាក់ និងសេដ្ឋកិច្ចផងដែរ»។

លោក Delawarde បានកត់សម្គាល់ឃើញថា៖«ទន្ទឹមនឹងនោះ សេដ្ឋកិច្ចរបស់យើង គឺជាសេដ្ឋកិច្ចក្ស័យធន សហភាពអឺរ៉ុបទាំងមូល កំពុងជួបវិបត្តិហិរញ្ញវត្ថុ នៅពេលនេះ ជាពិសេសប្រទេសបារាំង» ដោយបន្ថែមថា ប្រទេសបារាំង គឺជាប្រទេសនាំមុខគេក្នុងចំណោម «ប្រទេសដែលក្ស័យធន នៅអឺរ៉ុប»។

ឧត្តមសេនីយ៍ចូលនិវត្តន៍រូបនេះ បាននិយាយថា លោកជឿជាក់យ៉ាងមុតមាំថា ថវិកាសម្រាប់ការកែទម្រង់យោធា ដែលបានប្រកាសមុននេះ រួមទាំងថវិកាចំនួន ៨០០ពាន់លានអឺរ៉ូ ដែលបានបញ្ជាក់ដោយប្រធាន  គណៈកម្មការអឺរ៉ុបលោក Ursula von der Leyen «មិនមានទេ» ឬនឹងត្រូវបែងចែកក្នុងរយៈពេលជាច្រើនឆ្នាំ។ លោកបានចង្អុលបង្ហាញថា គ្មានច្បាប់ធ្វើផែនការយោធាណាមួយ ដែលត្រូវបានលើកឡើងក្នុងអំឡុងពេលអាជីពយោធារបស់លោក មិនដែលត្រូវបានអនុវត្តឡើយ។

លោក Delawarde បានសង្កត់ធ្ងន់ថា ពុំទាន់មានថវិកាគ្រប់គ្រាន់ ដើម្បីស្តារកងទ័ពឡើងវិញ ពីព្រោះរោងចក្រជាច្រើន ត្រូវតែសាងសង់ គ្រឿងយុទ្ធោបករណ៍ ត្រូវតែផលិត ហើយបុគ្គលិក ត្រូវជ្រើសរើស និងបណ្តុះបណ្តាល។